UFC’даги 4-жангини ўтказадиган Заррух Адашев, ўзбек клубларига 2+2 шаклида ўрин ажратган ОФК ва 30 миллион евро зарар кўрган «Барселона». Энг сўнгги спорт янгиликлари

Дунё ва ўзбек спортига оид 9 декабрнинг энг муҳим хабарлари дайжести билан танишинг.

Ўзбекистон

Осиё футбол конфедерацияси ташкилотга аъзо мамлакатлар ассоциацияларидан 2023 йилги мавсум давомида қитъанинг клублар миқёсидаги нуфузли мусобақаси — Осиё Чемпионлар Лигасида қатнашадиган клублар сонига аниқлик киритди, деб хабар берди ЎФА матбуот хизмати.

Унга кўра, Осиё Чемпионлар Лигасининг 2023 йилги мавсумида Ўзбекистон клубларига 2+2 кўринишида квота ажратилади. Бунда Ўзбекистон Суперлигаси чемпиони ва мамлакат кубоги ғолиби ОЧЛ баҳсларининг гуруҳ босқичига тўғридан-тўғри йўл олади. Миллий чемпионатнинг 2 ва 3-ўрин соҳиблари эса ОЧЛдаги юришини саралаш босқичидан бошлайди.

Маълумот учун, 2021 йилги мавсум якунларига бўйича Суперлига ғолиби «Пахтакор» Чемпионлар Лигасининг гуруҳ босқичига тўғридан-тўғри йўлланма олди. Кубок соҳиби «Насаф» эса ўз иштирокини плей-офф босқичидан бошлайди. Агар «аждарлар» саралашдан ўтишнинг уддасидан чиқса, Суперлигада 2-ўринни эгаллаган «Сўғдиёна» ҳам ОЧЛда иштирок этади.

ФИФА франциялик футболчи билан боғлиқ вазият туфайли «Насаф»га тақиқ қўйди. У қаршиликлар сафида битта ҳам ўйин ўтказмаган

ФИФА «Насаф» жамоасига тақиқ қўйди. Бунга қаршиликларнинг франциялик футболчи Абделае Диаките билан тузилган шартнома шартлари бажарилмагани сабаб бўлган. Қайд этиш, француз «Насаф» сафида бирорта ҳам ўйинда майдонга тушмаган.

Бу ҳақда батафсил бу ерда ўқиш мумкин

Заррух Адашев UFC’даги тўртинчи жангини ўтказади

Ўзбекистонлик яккакурашчига бу сафар бразилиялик Клейдсон Родригес (7-1) рақиб бўлади. Жанг 16 январь кунги UFC оқшомида бўлиб ўтади.

Бу Клейдсон учун UFC’даги дебют жанг ҳисобланади, 25 ёшли яккакурашчи профессионал MMA’да қаторасига 6 жангдан бери ғалаба қозониб келмоқда. Адашев эса UFC’даги кетма-кет икки мағлубиятдан кейин август ойида Райан Бенуани мағлуб этганди.

Жаҳон

Доменико Тедеско «Лейпциг» бош мураббийи этиб тайинланди. Бу ҳақда клуб матбуот хизмати хабар берди.

Қайд этилишича, 36 ёшли мутахассис билан 2023 йилнинг июнига қадар мўлжалланган шартнома тузилган.

Тедеско 11 декабрь куни Германия чемпионатининг 15-туридан ўрин олган «Боруссия М»га қарши ўйинда «Лейпциг» бош мураббийи сифатида дебют қилади.

«Барселона» 21 йил ичида илк бор ЕЧЛ плей-оффига чиқа олмади

«Барселона» Чемпионлар Лигаси гуруҳ босқичининг 6-турида «Бавария»га 0:3 ҳисобида мағлуб бўлди.

Каталония клуби 7 очко билан учинчи ўринни эгаллади ва турнирдан чиқиб кетди, эндиликда жамоа Европа Лигасида ўз юришини давом эттиради.

«Барселона» 21 йил ичида биринчи марта Чемпионлар Лигасининг плей-офф босқичига чиқа олмади. 2000/01 йилги мавсумда жамоа гуруҳда «Милан» ва «Лидс»дан кейин учинчи ўринни эгаллаганди. Ўшанда «Барса» Европа Лигасида ярим финалгача етиб бориб, «Ливерпуль»га ютқазганди (0:1).

Бунгача жамоа кетма-кет 17 марта мусобақанинг плей-офф босқичида қатнашганди. Мазкур серия 2004/05 йилги мавсумда, Лионель Месси асосий жамоада ўзининг биринчи мавсумини ўтказган пайтда бошланган ва аргентиналик клубни тарк этганидан кейинги дастлабки мавсумда тўхтади.

2003/04 йилги мавсумда Чемпионлар Лигаси гуруҳ босқичида иштирок этмаган, боиси Ла Лигада олтинчи ўрин билан кифояланганди.

«Барселона» ЕЧЛ плей-офф босқичига чиқа олмагани сабабли 30 миллион евро зарар кўради

«Барселона»нинг Чемпионлар Лигасини тарк этиши клубга молиявий томондан зарба беради.

Mundo Deportivo хабарига кўра, клуб бюджетида жамоанинг ҳар доимгидек Чемпионлар Лигасининг камида 1/4 финалига чиқиши кутилган.

Мусобақадан чиқиб кетиш бюджетга 30 миллион евродан кўпроқ зарар келтиради. «Барса» 1/8 финалга чиққани учун 9,6 миллион, чорак финалга чиққани учун эса 10,6 миллион олишни режалаштираётганди.

Шунингдек, ҳомийлар, телевидение ва ўйин кунидан тушадиган даромадлардан ҳам умид қилинганди.

Эндиликда Каталония клуби йўқотишларнинг ўрнини қоплаш учун Европа Лигасида камида финалга чиқиши керак бўлади.

Пелега 2-3 кун ичида шифохонадан жавоб берилади

Собиқ футболчи Пеленинг қизи Кели Насименто отасининг бир неча кундан кейин касалхонадан чиқишини маълум қилди.

81 ёшли бразилиялик 8 декабрь, пайшанба куни операциядан кейин олдиндан режалаштирилган даволаниш учун шифохонага ётқизилган.

Эслатиб ўтамиз, Пеле 6 сентябрь куни йўғон ичакдаги ўсимтани олиб ташлаш бўйича операцияни бошдан ўтказганди.

Чемпионлар Лигасида тарихий натижа ўрнатилди

Гуруҳ босқичида учта жамоа 6 та ўйиннинг барчасида ғалаба қозонди. «Бавария», «Аякс» ва «Ливерпуль» 6 учрашувда 18 очко жамғаришга муваффақ бўлди.

Бугунга қадар Чемпионлар Лигаси гуруҳ босқичида биттадан ортиқ жамоа гуруҳ босқичини 6 та ғалаба билан тугатмаган эди.

Аввалроқ бундай натижага «Милан» (1992/93), «ПСЖ» (1994/95), «Спартак» (1995/96), «Барселона» (2002/03), «Реал» (2011/12, 2014/15) ва «Бавария» (2019/20) эришган эди.