2020 йилда коронавирус пандемияси глобал қурол-яроғ савдосига тўсиқ бўлолмади — савдо кўрсаткичи 1,3 фоизга ошди. Бу ҳақда Стокгольм тинчлик тадқиқот институти (SIPRI) маълумотларида келтирилган.
«Саноат гигантлари, асосан, ҳукуматларнинг ҳарбий товар ва хизматларга бўлган кучли талаби ҳимоясида бўлган», — деди мудофаа харажатлари ва қуроллар бўйича SIPRI дастури тадқиқотчиси Александра Маркштейнер.
Қайд этилишича, дунёнинг аксарият мамлакатларида ҳарбий харажатлар ўсган, айрим ҳукуматлар эса коронавирус инқирози таъсирини юмшатиш мақсадида ҳатто қуролли саноатга пул тикишни ҳам тезлаштирган.
Умумий ҳисобда ўтган йили 100 та энг йирик қурол-яроғ компанияси жами 531 миллиард доллар фойда кўрган.
Шу билан бирга, таъкидланишича, ўтган йили сотувлар 2015 йилга — SIPRI тадқиқотга Хитой фирмалари ҳақидаги маълумотларни биринчи марта киритган йилга нисбатан 17 фоизга юқори бўлган. Ўшандан бери глобал қурол айланмаси кетма-кет олтинчи йил ўсди.
АҚШ дунёдаги энг йирик қурол-яроғ таъминотчиси бўлиб қолмоқда. Топ-100 рейтингига кирувчи 41 та Америка компанияси 285 миллиард долларлик қурол сотган, 2020 йилда уларнинг савдоси 2019 йилга нисбатан 1,9 фоизга ошди, глобал қурол савдосидаги улуши эса 54 фоизни ташкил этди.
Иккинчи ўринни Хитой компаниялари эгаллади. 2020 йилда Хитойнинг 100 таликка кирувчи бешта компанияси жами 66,8 миллиард долларлик қурол-яроғ сотган, бу 2019 йилга нисбатан 1,5 фоизга кўпдир. Хитой фирмаларининг жаҳон бозоридаги улуши 13 фоизини ташкил этган.
Қурол-яроғ сотувидаги энг йирик компаниялар улушининг 21 фоизи Европа ҳиссасига тўғри келади (109 миллиард доллар).
Ўтган йили Россия компаниялари 28,2 миллиард долларлик қурол сотган, бу 2019 йилга нисбатан 6,5 фоизга кам.
Изоҳ (0)