Эрон билан музокаралар иштирокчилари мамлакатнинг ядровий дастури бўйича Кенг қамровли қўшма ҳаракатлар режасини амалга оширишга қайтиш борасидаги саъй-ҳаракатларини икки баравар ошириши керак. Бу ҳақда 3 декабрь куни ўтказилган брифингда БМТ бош котиби вакили Стефан Дюжаррик маълум қилди, деб хабар беради «ТАСС».
«Биз музокараларнинг барча иштирокчиларини ушбу келишувларни амалга ошириш сари ҳаракат қилиш учун ўз саъй-ҳаракатларини икки баравар оширишга чақирамиз», — дейди у БМТ бош котиби Антониу Гуттеришнинг бу борадаги позицияси тўғрисидаги саволга жавоб берар экан.
Шу билан бирга, Дюжаррик қайта тикланган музокаралар жараёнининг истиқболлари бўйича ҳозирда бирор хулоса чиқармаслигини таъкидлаган.
Венада Теҳроннинг ядро бўйича Кенг қамровли қўшма ҳаракатлар режаси доирасида ўтказилган музокараларнинг еттинчи раунди 3 декабрь куни якунланди. Европалик иштирокчилар музокара жараёнини давом эттиришдан олдин консультация мақсадида ўз мамлакатларига қайтади. Шу билан бирга, Эрон ОАВлари маълумотларига кўра, томонлар музокаралар столига кейинги ҳафта қайтиши мумкин. Теҳроннинг маълум қилишича, Венадаги ядровий келишувни янгилаш бўйича музокаралар жараёни яхши, лекин секин кетмоқда.
Эслатиб ўтамиз, ядро бўйича қўшма ҳаракатлар режаси деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашган. 2018 йил май ойи бошида АҚШ келишувдан бир томонлама чиқишини эълон қилган ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этганди.
Изоҳ (0)