«Ўзбекнефтгаз» 2022 йилдан бошлаб Аи-80 бензинидан босқичма-босқич воз кечишни режалаштираётгани ҳақида хабар берилган эди. «Ўзбекнефтгаз» матбуот хизмати Бухоро нефтни қайта ишлаш заводида Аи-80 ўрнига Аи-92 бензин ишлаб чиқаришга ўтиш ниятида эканлигини маълум қилди.
Ушбу режа «Газпромнефть»га қарашли «Газпромнефть — Industrial Innovations» компанияси билан музокаралар чоғида муҳокама қилинган. Учрашув «Марказий Осиёнинг нефтни қайта ишлаш ва нефть кимёси — 2021» 8-халқаро конференцияси доирасида бўлиб ўтган.
Мулоқот давомида томонлар Россия компанияси томонидан ишлаб чиқилган ароформинг технологиясидан фойдаланиш масалаларини муҳокама қилган. Ароформинг енгил бензин фракцияларини катализатор ёрдамида метанол билан реакцияга кириштириб, юқори октанли бензин олиш имконини беради.
Spot’нинг қайд этишича, мазкур технология ёрдамида Бухоро нефтни қайта ишлаш заводида юқори октанли ёқилғи, хусусан, Аи-92 бензин ишлаб чиқариш кенгайтирилади. Бу Аи-80 бензин ишлаб чиқаришдан бутунлай воз кечиш имконини беради.
Учрашув якунлари бўйича «Ўзбекнефтгаз» Россия компанияси билан бир қатор шартномалар имзолаган. Жумладан, «Газпромнефть — Industrial Innovations» илмий-тадқиқот маркази технологик жараённи амалга ошириш учун зарур илмий-тадқиқот ишларини олиб боради.
Шунингдек, Бухоро нефтни қайта ишлаш заводида ароформлаш қурилмасини яратиш бўйича техник-иқтисодий асослаш ҳам кўриб чиқилади. Лойиҳанинг тахминий қуввати йилига 20 минг тонна бензинни ташкил этади.
Аввалроқ «Ўзбекнефтгаз» АЖга тегишли АЁҚШларда бензин тақчиллиги кузатилгани сабабли ижтимоий тармоқларда танқидий муҳокамалар бўлгани, шундан сўнг компанияга тегишли заправкаларда Аи-80 бензини нархи пасайгани ҳақида хабар берилган эди. Шунингдек, Ўзбекистонда бензин нархи ҳақида маълумот берувчи Telegram-бот ишга туширилиши маълум қилинганди.
Изоҳ (0)