Президент Шавкат Мирзиёев раислигида ўтказилаётган ипотека ва қурилиш материаллари мавзусидаги видеоселектор йиғилишида ҳар бир ҳудудда «уй-жой қурилиш кластерлари» ташкил этилиши маълум қилинди. Бу ҳақда «Дарё» мухбири хабар қилди.
Ушбу кластерларда лойиҳалаштириш, хом ашёдан тортиб, тайёр маҳсулотгача ишлаб чиқариш занжири, замонавий техника ва малакали мутахассислари бор қурилиш ташкилоти, сифатни назорат қилиш лабораторияси бўлиши шарт.
Давлат раҳбари бундай кластерлар Тошкент вилояти ва Навоийда ташкил этилган бўлиб, қурилиш конструкцияларининг 80 фоизини ўзи ишлаб чиқаради ва пудрат ишларини ҳам ўзи тўлиқ амалга оширишини айтиб ўтди. Натижада, 1 квадрат метр уйнинг таннархи 3,5 миллион сўм, яъни бошқа қурувчи корхоналарга нисбатан 20 фоизга арзон тушаётгани қайд этилди.
Вилоят ҳокимлари Ташқи савдо ва инвестициялар вазирлиги ва «Ўзсаноатқурилишбанк» билан бирга, уч ой муддатда айни кластерларни ҳар бир ҳудудда ташкил этиши бўйича топшириқ берилди.
Бунда, вилоят ҳокимлари, масалан, йирик цемент заводлари билан ишлаб, улар билан замонавий «уй-жой қурилиш кластерлари» ташкил этишлари кераклиги таъкидланди.
«‘Ўзсаноатқурилишбанк’ ‘уй-жой қурилиш кластерлариъни қўллаб-қувватлаш учун, 150 миллион доллар ресурс жалб қилсин», – дейди Президент.
Бунинг ҳисобидан, шундай кластерларга айланма маблағ учун 10 миллиард сўмдан револвер кредит, асбоб-ускуна ва қурилиш техникаси олиб келиш учун, 2 миллион долларлик узоқ муддатли кредитлар ажратилиши айтилди. Замонавий асбоб-ускуна ва қурилиш техникаси олиб келиш учун, 2 йилга божхона имтиёзлари берилади.
Шу билан бирга, «Ўзсаноатқурилишбанк» қурилиш ташкилотларига бундай техникаларни лизинг асосида харид қилиш имкониятларини кенгайтириш учун, 50 миллион доллар ресурс ажратиш бўйича бир ҳафта муддатда таклиф киритиши лозимлиги билдирилди.
Изоҳ (0)