Қарши шаҳридаги «Абу Али ибн Сино» номидаги жамоат саломатлиги техникуми талабаси ётоқхонанинг бешинчи қаватидан тушиб кетиб, вафот этгани ҳақида хабар берилганди. Талаба қиз тенгдошларининг эслашича, қиз ўлимидан аввал барча танишлари билан хайрлашгандек таассурот уйғотган.
«Дарё» мухбири воқеа тафсилотларини ўрганиш мақсадида техникум ётоқхонаси ва ўқув биносида бўлиб, марҳумани таниган-билганларни суҳбатга тортди.
Техникум ётоқхонаси тарбиячиси Фахриддин Сафаровнинг айтишича, марҳума опаси билан ётоқхонанинг тўртинчи қаватида яшаган бўлса-да, воқеа содир бўлган куни бешинчи қаватга чиқиб, юқори қават деразасидан ўзини пастга ташлаган.
«Кузатув камераларини кўздан кечирганимизда Маҳлиё бешинчи қаватга чиқиб, аввалига чиқинди ташлашга кетаётган таниши билан қучоқлашган. Ўша пайт хайрлашганми ёки саломлашганми ҳозирча бу бизга қоронғи. Аммо шундан сўнг бешинчи қават эшигини ёпиб, иккиланмасдан деразадан сакраган», — дейди ётоқхона тарбиячиси.
Ётоқхонанинг бешинчи қаватида яшовчи қизлар — Малоҳат Саломова ҳамда Соҳиба Йўлдошеваларнинг маълумот беришича, воқеа содир бўлган пайтда ётоқхонада бақир-чақир овоз эшитилган, улар умумий залга чиққанда эса мудҳиш воқеа содир бўлганидан хабар топган.
«Биз хонада ўтиргандик. Шунда қизларнинг бақир-чақир овози эшитилди. Хонадан умумий залга чиқсак, шу воқеа — қиз ўзини деразадан ташлаб юборганини айтишди. Деразадан қарасак, ҳақиқатан ҳам у пастда ётган экан. Кейин милициялар келишди», — дейди ётоқхонанинг бешинчи қаватида яшовчи талаба қизларнинг бири Соҳиба Йўлдошева.
Воқеа содир бўлган куни ётоқхонада навбатчилик қилган Мурод ака Ҳазратқуловнинг айтишича, ётоқхонада қизларнинг овози баландлашгани эшитилгач, у қизлардан нима бўлаётганини сўраган.
«2021 йилнинг 30 ноябрь куни соат тахминан 17:30 лар эди. Ҳали қоронғи ҳам тушиб улгурмаганди. Қизларнинг бақир-чақир овози эшитилгач, югуриб чиқдим. Чиқсам, қизнинг тепадан ўзини ташлаганини айтишди. Деразани очиб қарасам, қиз ерда ётган экан», — дейди Мурод Ҳазратқулов.
Марҳумани таниган қизлар унинг хушчақчақ қиз бўлганини, кайфиятида тушкунлик бўлмаганини айтмоқда.
«У жудаям шўх қиз эди. Умуман тушкун кайфиятда кўрмаганман. Заиф томони йўқ эди. Ҳар доим ёмон ҳолатдан ҳам яхши кайфият билан чиқа оларди. Ётоқхонада ҳам барча қизлар билан кулиб, хушчақчақ ҳолда гаплашарди», — дейди Малоҳат Саломова.
Соҳиба Йўлдошеванинг айтишича, марҳума адолатсизликка чидай олмаган. Кўпинча опаси билан тортишган.
«Адолатсизликка чидай олмасди. Кўпинча опаси билан тортишиб қоларди. Опаси уни бошқа бир йигит билан гаплашганликда айблаб, уйдагиларига айтган шекилли, ‘мен ҳеч ким билан гаплашмаганман, айбдормасман’, дерди. Ва шу боис ҳам қўлидаги интернетга кириш имконияти бўлган телефонини ҳам опасига берганди», — дейди Соҳиба Йўлдошева.
Марҳума билан ёнма-ён хонада истиқомат қилган Фарангиз Норқулова ҳам қизнинг хушчақчақлигини, руҳиятида умуман тушкунлик бўлмаганини айтмоқда.
«Мен ўша куни уйдан келгандим. Уни кун бўйи кўрмагандим. Нега бундай қилганига ҳайронман. Хушчақчақ қиз эди. Умуман ўз жонига қасд қиладиган даражада эмасди. Ҳар доим ўйнаб-кулиб юрарди», — дейди Фарангиз Норқулова.
Мурод Ҳазратқулов сўнгги икки йил давомида шу ётоқхонада фаолият юритиб келаётганини, бундай мудҳиш ҳолат биринчи маротаба содир бўлганини билдирмоқда.
«Ўша куни ўқувчилар ҳам, маҳалла аҳолиси ҳам йиғилиб, воқеа жойига борди. Тўғриси, шокка тушдим. Айниқса, марҳуманинг опаси аҳволини кўриб, жудаям раҳмим келди. Бу ҳолатни тасвирлаб беришга ожизман», — дейди ётоқхона тарбиячиси.
Эслатиб ўтамиз, Бош прокуратура ҳолат юзасидан Қарши шаҳар прокуратураси томонидан терговга қадар текширув ҳаракатлари олиб борилаётганини, марҳуманинг ўлими сабаблари ва ишга алоқадор бўлган бошқа ҳолатларга аниқлик киритиш мақсадида суд-тиббий экспертизаси тайинланиб, ишга алоқадор бўлган шахслардан тушунтириш хатлари олинаётганини маълум қилганди.
Изоҳ (0)