Фарғонада сўнгги кунларда содир бўлган йўл-транспорт ҳодисалари оқибатида 3 киши вафот этди. Қуйида ушбу ЙТҲ тафсилотларини тақдим этамиз.
Lacetti билан тўқнашган Nexia ҳайдовчиси машина ичида ёниб кетди.
Фарғона вилоятининг Олтиариқ туманида содир бўлган йўл-транспорт ҳодисаси оқибатида бир киши ҳалок бўлди. Бу ҳақда «Дарё»га вилоят ИИБ ЙҲХБ ахборот хизмати маълум қилди.
Маълум қилинишича, 2021 йил 19 ноябрь куни соат 16:10 ларда 1985 йилда Марғилон шаҳрида туғилган фуқаро Т.Э. Nexia-3 ни Олтиариқ тумани Катпут қишлоғи ҳудудидан ўтган 4Р-112 Фарғона ҳалқаси автомобиль йўлининг 257-километрида бошқариб кетаётиб, 1998 йилда Фарғона шаҳрида туғилган А.Ш. бошқарувидаги Lacetti билан тўқнашиб кетган.
Nexia-3 автомобилидан учқун чиқиб, ёнғин содир бўлиши оқибатида ҳайдовчи Т.Э. машина ичида ёниб кетиб, ҳодиса жойида вафот этган. Lacetti ҳайдовчиси А.Ш. ва унинг онаси Х.Р. тан жароҳати олиб шифохонага ётқизилган.
Мазкур ҳолат юзасидан Олтиариқ тумани ИИБ ҳузуридаги тергов бўлими томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.
Дарахтга урилган Lacetti ичида бўлган икки киши шифохонада вафот этди
Фарғона вилояти Фарғона туманида Олтиариқ–Водил автомобиль йўлининг 68-километрида Lacetti ҳайдовчиси автомобиль бошқарувини йўқотган ва йўл четидаги дарахтга урилган.
Оқибатда машинадаги 22 ва 16 ёшли фуқаролар оғир тан жароҳати олиб шифохонада вафот этган.
Мавзуга доир:
Изоҳ (0)