Қашқадарё вилояти ҳокими Муроджон Азимов Чироқчида рўй берган ИИБ ходимлари ва Lacetti ҳайдовчиси воқеасига муносабат билдириб, «ИИБ ходими оғир, босиқ ва маданиятли бўлиши керак», деб айтди. «Дарё» мухбирининг хабар беришича, вилоят раҳбари бу ҳақда 29 ноябрь, душанба куни бўлиб ўтган ҳокимлик йиғилишида гапирган.
Қайд этилишича, Муроджон Азимов вилоят ИИБ Йўл ҳаракати хавфсизлиги бошқармасининг янги раҳбари Азиз Садировни масъулларга таништириб, янги раҳбарга ЙПХ ходимлари жамоатчилик билан ишлаётганда маданиятли бўлиши лозимлигини уқтирган.
«Кеча ижтимоий тармоқларда кўрдик. ИИБ ходими қўлидаги таёқ билан фуқаро автомобилини уряпти. Бу нимаси? ИИБ ходими оғир, босиқ ва маданиятли бўлиши керак-ку. Майли, ҳайдовчи айбдор, лекин ИИБ ходими бундай пайтда ақл билан иш тутиши керак», — деган вилоят ҳокими Чироқчидаги воқеани тилга оларкан.
Эслатиб ўтамиз, Чирпоқчида ИИБ ходимлари ва Lacetti ҳайдовчиси ўртасидаги келишмовчилик 27 ноябрь куни Чироқчи тумани марказидаги туман йўл ҳаракати хавфсизлиги бўлими маъмурий биноси ёнида содир бўлганди. 28 ноябрда эса ҳолат акс этган видеолар ижтимоий тармоқларда тарқалди.
Унда ЙПХ инспектори ва вилоят ИИБга қарашли тезкор вазифаларни бажарувчи сафарбарлик отряди вакиллари Lacetti’нинг икки ён ва олд томонидан тўсиб тургани, сўнг машина улар устига ҳайдаб, кетиб қолгани акс этган. Шунингдек, Lacetti жойидан қўзғалганида махсус отряд ходимлари уни дубинка билан урганини, оқибатда автомобилнинг орқа ойнаси синганини кўриш мумкин.
Воқеадан бир кун ўтиб мазкур ҳайдовчи ушланди ва унга нисбатан жиноят иши қўзғатилди, автомобили эса вақтинча сақлаш учун жарима майдонига жойлаштирилди.
Изоҳ (0)