Ўзбекистонда авиаюкларни ташишни электрон расмийлаштириш платформаси — e-Freight халқаро стандарти жорий этилади. Бу ҳақда Транспорт вазирлиги хабар қилди.
Маълум қилинишича, вазирлик томонидан Uzbekistan Airports акциядорлик жамияти иштирокида e-Freight юк ташувларини электрон расмийлаштириш ахборот платформасини жорий этиш ва электрон ҳужжатлардан фойдаланган ҳолда «ягона дарча» режимида назорат-текширув функцияларини амалга ошириш масалаларига бағишланган семинар бўлиб ўтган.
Қайд этилишича, Ўзбекистонга ҳар куни юзлаб тонна турли хил юклар етказиб берилади. Юклар билан бирга тонналаб ҳужжатлар ҳам келиб тушади. Бир товар учун ўртача 20 га яқин турли рухсатномалар расмийлаштирилади. Электрон ҳужжат айланмасига ўтиш нафақат миллионлаб дарахтларни сақлаб қолиш, балки товарларни етказиб бериш жараёнини соддалаштириш ва тартиб-таомилларни имкон қадар шаффоф қилиш имконини беради.
«e-Freight — бу IАТА томонидан тавсия этилган ва дунёнинг кўплаб мамлакатларида қабул қилинган халқаро стандарт. Мазкур платформанинг Ўзбекистонда жорий этилиши хорижий логистика компаниялари ва авиаташувчилар учун аэропортларимиз рақобатбардошлиги ва жозибадорлигини сезиларли даражада оширади», — дейди Uzbekistan Airports бошқаруви раиси Рано Жўраева.
Эслатиб ўтамиз, Ўзбекистон ҳаво йўллари орқали 2021 йил январь—сентябрь ойларида 4 минг тонна юк ташилган. Юк ҳажми ўтган йилнинг мос даврига нисбатан 13,3 фоизга ошган.
Изоҳ (0)