Rossiyadan O‘zbekistonga 24-noyabr kuni birinchi “Agroekspress” poyezdi yetib keldi, deb xabar bermoqda “O‘zbekiston temir yo‘llari” matbuot xizmati.

Foto: “O‘zbekiston temir yo‘llari” matbuot xizmati

Ushbu poyezd 17-noyabr kuni Rossiyaning Tambov shahridagi “Sna” stansiyasidan yo‘lga chiqqan bo‘lib, Qozog‘iston orqali muzlatkichli konteynerlarda parranda go‘shti olib kelindi. Qaytishda O‘zbekistondan mevalar olib ketilishi rejalashtirilgan.

Loyiha O‘zbekiston va Rossiya o‘rtasida logistika koridorlarini rivojlantirish bo‘yicha ikki tomonlama hamkorlikni kengaytirish doirasida amalga oshirilgan.

“Agrosanoat kompleksining pilot konteyner partiyasini ishga tushirish chegaradan o‘tish va bojxona tartib-qoidalarini, yo‘lda tovarlar xavfsizligi sifatini sinovdan o‘tkazish imkonini berdi, shuningdek, keyingi qatnovlarga tovarlarni yetkazib berish jarayonini soddalashtirish va takomillashtirish imkoniyatlarini ko‘rsatdi”, — degan “O‘zbekiston temir yo‘llari” Logistikani rivojlantirish va raqamlashtirish bosh boshqarmasi boshlig‘ining birinchi o‘rinbosari Rustam Muhamedov.

Eslatib o‘tamiz, iyun oyida UzAgroLogistics Center agrologistika markazi, RJD Logistika AJ va “Rossiya eksport markazi” AJ Rossiya—O‘zbekiston logistika koridorini rivojlantirish hamda agrosanoat import va eksport yuklarini “Agroekspress” tezyurar refrijeratorli konteynerli poyezdlarida tashish borasida hamkorlik bo‘yicha kelishuv imzolagandi.

Hujjatda “Agroekspress” konteynerli tezyurar temiryo‘l poyezdlarining harakatini yo‘lga qo‘yish orqali Rossiya—O‘zbekiston logistika koridori loyihasini rivojlantirish va qo‘llab-quvvatlash sohasida tomonlarning o‘zaro manfaatli hamkorligini takomillashtirish nazarda tutilgan. Bundan tashqari, noxomashyoviy noenergetik eksportni rivojlantirish, transport xizmatlari eksporti, shuningdek, boshqa hamroh ish va xizmatlarni taraqqiy ettirish sohasida hamkorlikdagi loyihalarni amalga oshirish ko‘zda tutilgan.

Rossiya buning natijasida o‘z ichki bozorini sifatli meva va sabzavotlar bilan ta’minlashni ko‘zlamoqda, o‘z navbatida O‘zbekistonga go‘sht, un va boshqa qishloq xo‘jaligi mahsuloti yuboradi. Loyihaga Qozog‘iston ham qo‘shilgan.