Жонс Ҳопкинс университети маълумотларига кўра, дунёда коронавирусга чалинганлар сони 260 221 634 кишини ташкил қилмоқда, шуларнинг 5 185 350 нафари вафот этган. Айни вақтга қадар жаҳон бўйича 7,544 миллиард доза вакцина қўлланган.

Касалланганлар сони бўйича АҚШ (48,1 миллион), Ҳиндистон (34,5 миллион), Бразилия (22 миллион), Буюк Британия (10 миллион) ва Россия (9,3 миллион) энг олдинда бормоқда

Тиббиёт ходимлари Брюсселда мажбурий эмлаш санкциялари лойиҳасига қарши намойиш қилиш учун йиғилди.

Фото: Getty Images

Хитойдаги карантин меҳмонхонасида коронавируснинг Жанубий Африкада пайдо бўлган янги ва хавфлироқ штамми (B.1.1.529) билан касалланиш бўйича иккита ҳолат аниқланди. Ушбу штамм Хитойга Гонконгдаги Regal Airport карантин меҳмонхонасига жойлаштирилган одамлар билан «келган». Вирус аниқланган икки киши бешинчи қаватда бир-бирига қарама-қарши хоналарда яшаган: биринчи бемор Гонконгга Жанубий Африкадан келган. Беморлар аллақачон касалхонага юборилган. Уларга қўшни хоналарда турган 12 киши энди Penny’s Bay марказида икки ҳафталик қўшимча мажбурий карантиндан ўтиши керак. Хитой Соғлиқни сақлаш департаментининг маълумотларига кўра, худди шу куни Гонконг аэропортидаги Вақтинчалик намуналар йиғиш марказида ушбу штаммга чалиниш бўйича яна тўртта ҳолат аниқланган.

Британия ва Исроил ҳукумати COVID-19 нинг янги штамми туфайли Африканинг бир қанча мамлакатларига боришни тақиқлади. Буюк Британия ҳукумати маълумотларига кўра, 26 ноябрь куни Жанубий Африка, Ботсвана, Эсватини, Лесото, Намибия ва Зимбабве «қизил» рўйхатга киритилади. 28 ноябрь куни эрталаб соат 04:00 га қадар ушбу мамлакатлардан барча тўғридан-тўғри тижорий ва хусусий рейслар тақиқланади. Мазкур давлатларда бўлиб қайтган британияликлар 10 кун давомида меҳмонхона карантинидан ўтиши керак бўлади.

«Ушбу вариант билан боғлиқ биринчи белгилар у коронавируснинг ‘ҳиндча’ штаммидан кўра юқумлироқ бўлиши мумкинлигини кўрсатмоқда. Шунингдек, мавжуд вакциналарнинг унга қарши самарадорлиги пастроқ бўлиши мумкин», — деди Буюк Британия соғлиқни сақлаш вазири Сажид Жовид.

Исроил ҳукумати ҳам ўз фуқароларига Африка жанубига саёҳат қилишни, шунингдек, бу минтақадан Исроилга чет элликларнинг киришини тақиқлади.

Reuters хабарига кўра, Жанубий Африка, Лесото, Ботсвана, Зимбабве, Мозамбик, Намибия ва Эсватини Исроилнинг «қизил» ёки саёҳат учун энг хавфли мамлакатлар рўйхатига қўшилди, бу рўйхат хорижий давлатлардаги коронавирус даражасини акс эттиради. Исроил Соғлиқни сақлаш вазирлигидан махсус рухсат олмаган фуқароларга қизил рўйхатга киритилган мамлакатларга бориш тақиқланади.

Ушбу чора-тадбирлар ҳақида эълон қилган Исроил бош вазири Нафтали Беннет канцеляриясида маълум қилинишича, юқоридаги еттита Африка давлати фуқароларининг Исроилга киришига рухсат берилмайди. Қайд этилишича, ушбу мамлакатлардан ватанига қайтган исроилликлар келганидан кейин 7 кундан 14 кунгача меҳмонхоналарда карантиндан ўтиши шарт бўлади.

Словакия ҳукумати бутун аҳоли, жумладан, COVID-19 дан тузалган ва коронавирусга қарши эмланганлар учун икки ҳафталик қатъий локдаун жорий қилди. Мамлакатда барча умумий овқатланиш шохобчалари ёпилди,  озиқ-овқат маҳсулотлари ва зарурий товарлар сотиладиган дўконлар, дорихоналар, ёқилғи қуйиш шохобчалари ва муҳим инфратузилмага эга дўконларгина ишлашда давом этади. Одамларга фақат энг яқин дўконга, ишга, эмланишга ёки касалхонага бориш учун уйларини тарк этишга рухсат берилади.

Университет ва коллежлар тўлиқ, мактаблар эса қисман масофавий таълимга ўтказилди. Итларни яшаш жойидан 500 метрдан узоқ бўлмаган масофада сайр қилдириш мумкин. Ҳукумат 10 кундан кейин эмланганлар учун баъзи чоралар юмшатилишини маълум қилди. Локдаун билан бир вақтда Словакия ҳукумати ҳаракат эркинлигини чеклайдиган 90 кунлик фавқулодда ҳолат режимини эълон қилди. Мамлакатда комендантлик соати жорий этилмоқда: одамларга соат 01.00 дан 05.00 гача уйларини тарк этиш тақиқланган. Ҳукумат шифохоналардаги вазиятни, шунингдек, SARS-CoV-2 билан кунлик касалланишлар сонини пандемия бошидан бери энг юқори чўққига чиққан ва ўта оғир деб баҳоламоқда.

Шунингдек, Германияда сўнгги сутка давомида коронавирус юқтирганлар сони ўз рекордини янгилади — 76 414 киши. Мамлакатда COVID-19 билан касалланганларнинг умумий сони 5 650 170 нафарга етди. 24 соат ичида 357 нафар бемор коронавирусдан вафот этган. Германияда пандемия бошидан буён инфекция қурбонларининг умумий сони 100 476 нафарга етган. Шу билан бирга, 4 775 300 киши COVID-19 дан тузалиб кетган.