25 ноябрдан Ўзбекистонда «Зўравонликка қарши биргаликда курашамиз» шиори остида 16 кунлик кампания бошланади, деб хабар беради Сенат матбуот хизмати. Бу йил 30 йиллигини нишонлаётган хотин-қизларга нисбатан зўравонликка қарши ушбу глобал кампания жаҳоннинг 187 та мамлакатида ўтказилиб, 6 мингдан зиёд ташкилотлар ҳамда 300 миллион кишини қамраб олмоқда.
«Гендер зўравонлик географик, ижтимоий ёки иқтисодий чегараларнинг билмаслигини кўриб турибмиз. Ривожланаётган, ривожланган мамлакатларда ҳам бу муаммога барҳам бериш жиддий чоралар кўришни талаб қилади. Мамлакатимизда аёлларга нисбатан зўравонликнинг олдини олиш, зўравонлик қурбонларини реабилитация қилиш бўйича қатор аниқ чора-тадбирлар амалга оширилди. 8 та норматив-ҳуқуқий ҳужжат қабул қилинди, шундан 2 таси қонунлардир», — дейди Сенат раиси Танзила Норбоева.
Унинг сўзларига кўра, шу билан бирга, жамиятда хотин-қизларга нисбатан зўравонлик ҳолатлари учраб турибди, бундай ҳолатларни энди яшириб бўлмайди. «Аммо баъзи опа-сингилларимиз ўзлари билан содир бўлган зўравонлик ҳолатларини ошкор қилмасликни афзал кўришларини ҳам яхши биламиз. Ушбу йўналишда дастлабки қадамлар қўйилди, аммо олдинда узоқ ва машаққатли ишлар турибди. Бу курашда ҳар биримизнинг иштирокимиз муҳим», — дея қайд этади Норбоева.
БМТ маълумотларига кўра, 15 ёшдан ошган ҳар учинчи аёл ҳаёти давомида камида бир марта бўлса ҳам, жисмоний ёки жинсий зўравонликка учрамоқда.
Эслатиб ўтамиз, 2021 йилнинг майида Ўзбекистонда аёлларни реабилитация қилиш республика марказлари ташкил этилди. Марказларнинг асосий вазифаларидан бири тазйиқ ва зўравонликдан жабр кўрган, ўз жонига суиқасд қилган ёки ўз жонига қасд қилишга мойиллиги бўлган хотин-қизларга аноним тарзда шошилинч тиббий, психологик, ижтимоий, педагогик, ҳуқуқий ва бошқа ёрдам кўрсатиш ҳисобланади.
Маҳалла ва оилани қўллаб-қувватлаш вазирлиги ҳузурида 29 та аёлларни реабилитация қилиш ва мослаштириш маркази ташкил этилган. Шу вақтгача реабилитация марказлари нодавлат нотижорат ташкилоти сифатида фаолият юритиб келган бўлса, эндиликда уларнинг фаолияти тўлиқ давлат бюджети ҳисобидан молиялаштирилиши белгиланган. Тазйиқ ва зўравонликдан жабр кўрган, ўз жонига суиқасд қилган ёки шунга мойиллиги бўлган хотин-қизлар билан ўзаро алоқа ўрнатиш ва тезкор руҳий, психотерапевтик, ҳуқуқий ёрдам кўрсатиш, маслаҳат бериш ва ахборот тақдим этиш мақсадида 1146 ишонч телефони «Aziz-ayol.uz» ягона интерактив миллий платформаси билан мувофиқлаштирилган.
Маълум қилинишича, ҳуқуқлари ва қонуний манфаатлари бузилганлиги тўғрисида мурожаат қилган 74 мингдан ортиқ хотин-қизга соҳанинг етук мутахассислари томонидан ҳуқуқий ёрдам кўрсатилган. «Аёллар дафтари»даги тазйиқ ва зўравонликдан жабрланган, ижтимоий муаммолари мавжуд 71 мингдан зиёд хотин-қизга малакали психологик кўмак берилган. Оилавий зўравонликнинг олдини олиш ва бундан жабр кўрганларга амалий кўмак бериш бўйича бош прокурор ўринбосари раҳбарлигида ваколатли давлат идоралари раҳбарлари даражасидаги ишчи гуруҳ фаолияти йўлга қўйилган.
Бугунги кунда парламент томонидан ваколатли давлат идоралари билан ҳамкорликда миллий қонунчиликни янада такомиллаштириш бўйича қатор таклифлар ишлаб чиқилмоқда, дейилади баёнотда.
Изоҳ (0)