O‘zbekistonda 2021-yilning 6 oyi davomida 400 ga yaqin erkak Ayollarni reabilitatsiya qilish va moslashtirish markazlariga murojaat qilgan. Bu haqda AOKAda oiladagi zo‘ravonlikning oldini olish, jabr ko‘rganlarga ko‘mak berish, xotin-qizlarning huquqiy savodxonligini oshirish borasida amalga oshirilayotgan ishlarga bag‘ishlab o‘tkazilgan matbuot anjumanida ma’lum qilindi.
Foto: “Gazeta.uz”
Mahalla va oilani qo‘llab-quvvatlash vazirligi huzurida Ayollarni reabilitatsiya qilish va moslashtirish respublika markazi va uning hududiy bo‘limlariga 2021-yilning 6 oyi davomida jami 5 958 nafar fuqaro murojaat qilgan bo‘lib, shundan 5 348 nafari (89,7 foizi) ayol, 393 nafari (6,6 foizi) erkak va 217 nafari (3,6 foizi) 18 yoshgacha bo‘lgan bolalardir.
Markazga eng ko‘p murojaat qilish holatlari 4 ta hududga to‘g‘ri keladi, ya’ni Toshkent shahridan — 1 598 nafar, Jizzax viloyatidan — 861 nafar, Namangan viloyatidan — 540 nafar, Qashqadaryo viloyatidan — 539 nafar fuqarolar murojaat qilgan.
Murojaatchilarning 2 368 nafari huquqiy va psixologik maslahat olish uchun bog‘langan bo‘lib, ularning murojaatlarida zo‘ravonlikka uchrash alomatlari aniqlanmagan. 1 908 nafar murojaatchi — ruhiy, 1 094 nafari — jismoniy, 562 nafari — iqtisodiy, 26 nafari— jinsiy zo‘ravonlikka uchraganini ma’lum qilgan.
Ruhiy zo‘ravonlikka uchraganlarning 1 766 nafari, ya’ni 93 foizini ayollar tashkil etgan. Sodir etilayotgan ruhiy zo‘ravonlik, asosan, 1 841 ta holatda oilada, 1 353 ta holatda er-xotin o‘rtasidagi nizolar oqibatida kelib chiqqanligi aniqlangan.
Jismoniy zo‘ravonlikka uchraganlarning 1 071 nafari, ya’ni 98 foizi ayollardir. Jismoniy zo‘ravonlik 865 ta holatda er-xotin, 157 ta holatda qaynona-kelin (kuyov), 43 ta holatda ota-ona va farzand o‘rtasidagi mojarolar oqibatida sodir etilgan.
Ma’lumot uchun, Prezidentning 2021-yil 19-maydagi qarori bilan Ayollarni reabilitatsiya qilish va moslashtirish markazlari tashkil etilgan. Ular bungacha Zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish markazlari deb nomlangan tuzilmalar negizida tashkil etilgan.
