Microsoft корпорацияси ўтган ҳафта Ҳиндистоннинг Nayara Energy нефтни қайта ишлаш компаниясини ўзининг булутли хизматларидан вақтинча узиб қўйди. Бунга сабаб компаниянинг Россиянинг “Роснефть” билан алоқадорлиги туфайли жорий этилган Европа Иттифоқи санкциялари бўлди. Бу ҳақда Тhе Register нашри хабар бермоқда.
Можаро 18 июлда Европа Иттифоқи Россияга қарши янги санкциялар пакетини тасдиқлаши билан бошланган. Ҳужжатда таъкидланишича, Ҳиндистоннинг Вадинар шаҳридаги нефтни қайта ишлаш заводига эгалик қилувчи Nayara Energy компаниясининг 49 фоизи Россиянинг “Роснефть” давлат компаниясига тегишли.
Европа Иттифоқининг фикрича, Nayara Energy “Россия Федерацияси ҳукумати учун муҳим даромад манбаи бўлган иқтисодий секторга жалб этилган”, бу эса уни санкциялар объектига айлантиради.
Nayara Energy санкцияларни “асоссиз даъволарга асосланган бир томонлама қадам” ва “халқаро ҳуқуқни ҳам, Ҳиндистон суверенитетини ҳам эътиборсиз қолдирадиган ваколатларнинг асоссиз кенгайтирилиши” деб баҳолаган.
Microsoft Nayara Energy учун ўзининг булутли маҳсулотларига, жумладан Outlook корпоратив почтаси ва Teams ҳамкорлик платформасига киришни тўсиб қўйган.
Бунга жавобан Ҳиндистон компанияси судга ариза билан мурожаат қилиб, Microsoft’ни “хизмат кўрсатишни тўхтатиш бўйича бир томонлама қарор қабул қилганликда” айблаган ва IT гигантни шартнома шартларини бажаришга мажбурлашни талаб қилган. Бироқ икки кундан сўнг Microsoft хизматларга киришни қайта тиклади.
Шунга қарамай, Nayara Energy хорижий таъминотчиларга қарамликни камайтириш мақсадида аллақачон Ҳиндистоннинг маҳаллий Редифф компанияси билан корпоратив электрон почта хизматларини кўрсатиш бўйича шартнома тузган.
Изоҳ (0)