Энергетика вазирлиги штаби томонидан 17 ноябрь куни Тошкент вилоятининг Чирчиқ шаҳрида жойлашган Shirina Petrol ва Тошкент туманида жойлашган Clean Gas Service МЧЖларга қарашли автомобилларга газ тўлдириш компрессор шохобчаларида табиий газдан фойдаланиш қоидаларига риоя этилиши юзасидан текшириш ўтказилди, деб хабар беради вазирлик матбуот хизмати.
Ўрганиш давомида бу икки тадбиркор томонидан 1 миллион 635 минг куб метр ёки бугунги кунда 100 минг аҳоли хонадонларининг бир кунлик истеъмолига етарали миқдордаги табиий газдан ноқонуний фойдаланилгани аниқланган.
Хусусан, текшириш давомида Shirina Petrol МЧЖ томонидан электрон газ ҳисоблаш ускунасига ташқи таъсир кўрсатиш имкони бўлгани ва ўтказилган эксперемент давомида конфигурация созламаси технологик йўриқномалар талабига мос эмаслиги сабабли қайта ҳисоб-китоб қилиниши натижасида 1 миллиард 274 миллион 700 минг сўм зарар етказилгани маълум бўлган.
Шунингдек, Clean Gas Service МЧЖ томонидан шартнома ҳужжатларидан ташқари 1 дона компрессор ускуна ортиқча ўрнатилгани сабабли амалга оширилган қайта ҳисоб-китоб натижасида 360,5 миллион сўм зарар етказилгани аниқланган.
Юқоридагилардан келиб чиқиб, ўтказилган текшириш ҳужжатлар қонун доирасида чора кўрилиши учун ҳуқуқни муҳофаза қилиш органларига юборилган.
Аввалроқ Ўзбекистондаги газ заправкаларининг иш вақтига чеклов ўрнатилгани, Ўзбекистонда октябрь ойида деярли 4 млрд сўмлик газдан ноқонуний фойдаланилгани аниқлангани, Ўзбекистон аҳолисининг табиий газдан қарздорлиги 500 млрд сўмдан ошгани тўғрисида хабар берилганди.
Изоҳ (0)