Ўзбекистонда Транспорт вазирлиги томонидан автомобиль ташувлари соҳасида ҳуқуқбузарлик содир этган шахсларни аниқлаш, уларга нисбатан маъмурий ҳуқуқбузарликлар тўғрисидаги ишларни расмийлаштириш ва кўриб чиқишда электрон тизим ўрнатилган планшетлардан фойдаланиш йўлга қўйилмоқда. Бу ҳақда вазирлик матбуот хизмати хабар берди.
Вазирлар Маҳкамасининг 2021 йил 8 июлдаги «Маъмурий ҳуқуқбузарликлар тўғрисида ишларни юритишнинг электрон тизимини жорий этиш бўйича қўшимча чора-тадбирлар ҳақида»ги 431-сонли қарорига мувофиқ, шунингдек, Транспорт вазирлиги ходимлари томонидан замонавий ахборот технологияларидан кенг фойдаланган ҳолда автомобиль ташувлари соҳасидаги маъмурий ҳуқуқбузарликларга оид ишларни расмийлаштириш ва кўриб чиқишнинг соддалаштирилган тартибини жорий этиш мақсадида янги тартибда ишлашга ўтилмоқда.
Дастлабки босқичда автомобиль ташувлари соҳасидаги маъмурий ҳуқуқбузарликлар тўғрисидаги ишларни кўриб чиқиш ва расмийлаштириш электрон тизим ўрнатилган планшетлар орқали Тошкент шаҳар ва Тошкент вилояти транспорт бошқармалари томонидан амалга оширилади.
Планшетлардан фойдаланган ҳолда маъмурий баённомаларни расмийлаштириш жараёнини амалиётда қўллашни ташкил этиш мақсадида ИИВ Ҳуқуқий статистика ва тезкор-ҳисоб маълумотлар маркази бўлим бошлиғи ва масъул ходимлари иштирокида тадбир бўлиб ўтган. Тадбирда маъмурий баённомаларни планшетлар ёрдамида расмийлаштириш тартиби юзасидан батафсил маълумот берилган.
Шунингдек, тадбир якунида Тошкент шаҳар ва Тошкент вилояти транспорт бошқармалари инспекторларига бириктирилган планшетлар тақдим этилган.
Аввалроқ Ўзбекистонда 1 январдан автотранспорт воситаларини сотиб олганлик учун йиғим бекор қилиниши мумкинлиги, мамлакатда таксичилик билан шуғулланувчи жисмоний шахслар ҳар ой 150 минг сўм солиқ тўлаши тўғрисида хабар берилганди.
Изоҳ (0)