Тошкент шаҳар ИИББ ижтимоий тармоқларда тарқалган ҳайвонларга нисбатан шафқатсизлик қилган йигит видеоси юзасидан маълумот бериб, ушбу фуқаронинг шахси аниқланганини маълум қилди.
Ижтимоий тармоқларда номаълум шахс Тошкентнинг Яшнобод туманида мушукларни қийнагани ва ўлдиргани тасвирланган видеолар тарқалди. Эълон қилинган кадрлардан кўриш мумкинки, яхши кийиниб олган 16—20 ёш атрофидаги йигит мушукларни пакет ёрдамида алдаб ушлаган ва уларни подъездга олиб кириб, қийнаган. 40 дақиқа ичида у бешта мушукни қийнаган ва уларнинг бирини ўлдирган.
Таъкидланишича, мазкур ҳолат 16 ноябрь куни тахминан соат 15:00 да Яшнобод туманида кузатув камералари орқали қайд этилган.
Пойтахт ИИББ матбуот хизматининг маълум қилишича, видеодаги йигит — 20 ёшли И.А. экани маълум бўлган. Йигит Яшнобод тумани ИИО ФМБ 1-сон ички ишлар бўлимига етказилган, суҳбат давомида у қилмишига иқрор бўлган. Ҳозирги вақтда мазкур факт бўйича тергов олди текшируви ўтказилмоқда, унинг натижаларига кўра қонуний чора кўрилади.
Бундан аввал Тошкент вилоятида итлар сўйиб сотилаётгани тўғрисидаги хабар ўз тасдиғини топмагани, Наманганда итни дарахтга осган болаларнинг ота-оналари ва уни видеога олиб тарқатган болалар жаримага тортилгани ҳамда Олмалиқда итни майиб қилган уйсиз ҳайвонларни ушлаш хизмати ходимига 122 минг сўм жарима солингани ҳақида хабар берилганди.
Изоҳ (0)