Қашқадарё вилояти Бандлик бош бошқармаси Давлат меҳнат инспекцияси томонидан ижтимоий тармоқларда тарқалган «Эко-ҳаёт» МЧЖ томонидан ходимларга ойлик иш ҳақи берилмагани айтилган хабар бўйича ўрганиш ўтказилди. Бу ҳақда Бандлик ва меҳнат муносабатлари вазирлиги матбуот хизмати хабар берди.
Ижтимоий тармоқларда Қашқадарё вилояти Муборак туманидаги газни қайта ишлаш заводининг қарийб 60 гектар ҳудуди тозалигига жавоб берадиган «Эко-ҳаёт» МЧЖ ходимларига иш ҳақи ўз вақтида тўланмаётгани юзасидан видеолавҳа тарқалди.
Ишчилардан бирининг сўзларига кўра, қачон ҳокимликка шикоят қилиб боришса, ойлик бериб келинган, охирги вақтларда ҳокимлик ҳам уларни тингламай қўйган. Маош нима сабабдан кечиктирилаётганига ойдинлик киритиш мақсадида ташкилот раҳбари билан боғланилган, аммо у учрашувдан бош тортган.
«Ўзбекнефтгаз» АЖ Муборак газни қайта ишлаш етакчи муҳандиси Исмоил Тилаковнинг таъкидлашича, заводнинг ободонлаштириш хизматларини кўрсатадиган «Эко-ҳаёт» ташкилоти олдида муддати ўтган қарздорлик мавжуд эмас.
Бандлик ва меҳнат муносабатлари вазирлигининг маълум қилишича, «Эко-ҳаёт» МЧЖ томонидан фуқаро Т.Шомирзаев ва жамиятнинг 171 нафар ишчи ва хизматчиларининг 2021 йил август ойи иш ҳақлари тўлиқ, сентябрь ойи иш ҳақининг эса 55 фоизи 28 октябрь куни тўлаб берилган.
Шунингдек, жамият томонидан фуқаро Т.Шомирзаевнинг 2021 йил сентябрь ойи иш ҳақининг 45 фоизи ва октябрь ойи иш ҳақи жами 1 711 386 сўм ҳамда жамиятнинг 171 нафар ишчи ва хизматчиларининг 222 275 857 сўм миқдоридаги иш ҳақлари Меҳнат кодексининг 154-, 161-моддалари (меҳнатга ҳақ тўлаш кафолатлари, меҳнатга ҳақ тўлаш муддатлари) талабига кўра тўлаб берилмагани аниқланган. Мазкур иш ҳақларини ундириш масаласида Давлат меҳнат инспекцияси томонидан томонидан фуқаролик ишлари бўйича Косон туманлараро судига даъво аризаси киритилган.
Аввалроқ Андижонда уйида ободонлаштириш ходимларини мажбуран ишлатган прокурор ишдан олингани, Андижон ва Жиззах нефть базалари собиқ раҳбарларига оид жиноят иши судга оширилгани тўғрисида хабар берилганди.
Изоҳ (0)