Chirchiqda hokimlik binosi oldida namoyishga chiqqan quruvchilarning ish haqini to‘lamagan tadbirkor jarimaga tortildi
Toshkent viloyatining Chirchiq shahri hokimligi binosi yaqinida ish haqlari to‘lanmagan quruvchilar norozilik bildirib, namoyishga chiqqanidan so‘ng ularning barchasiga ish haqlarining ma’lum qismi to‘lab berilgandi. Bandlik va mehnat munosabatlari vazirligi matbuot xizmati ularga ish haqini o‘z vaqtida bermagan kompaniya rahbari jarimaga tortilganini ma’lum qildi.
Vazirlik xabarida aytilishicha, Chirchiq shahar hokimiyati va davlat mehnat huquq inspektori aralashuvi bilan ishchilarning ishlagan davri uchun 280 million so‘m ish haqlari to‘lab berildi va qolgan maoshlari 18-may kuni “Vodiy sarkor dizayn” MChJ tomonidan to‘liq to‘lab beriladi.
“Vodiy sarkor dizayn” MChJ rahbariga nisbatan Mehnat kodeksining 154- (mehnatga haq to‘lash kafolatlari) va 161-moddalari (mehnatga haq to‘lash muddatlari) buzilganligi uchun ma’muriy javobgarlik to‘g‘risidagi kodeksning 49-moddasi 1-qismiga (mansabdor shaxs tomonidan mehnat va mehnatni muhofaza qilish to‘g‘risidagi qonun hujjatlarini buzish) ko‘ra ma’muriy bayonnoma rasmiylashtirildi.
Avvalroq Olmaliq kon-metallurgiya kombinatiga ishga joylashish masalasi sabab bir guruh ayollar shahardagi yo‘lning qatnov qismi to‘sib qo‘ygandi. Holat Bandlik va mehnat munosabatlari vazirligi tomonidan o‘rganib chiqilib, tegishli choralar belgilangan.
