Ўзбекистон Буюк Британиянинг Преференциялар бош тизими (GSP EF)нинг Кенгайтирилган схемасига қўшилган биринчи мамлакатга айланди. Бу ҳақда Инвестициялар ва ташқи савдо вазирлиги ҳамда Буюк Британиянинг Ўзбекистондаги элчихонаси иштирокидаги матбуот анжуманида айтиб ўтилди, деб хабар бермоқда «Дарё» мухбири Севара Мирзараҳимова.
Ушбу янгилик Ўзбекистонга Буюк Британияга экспорт ҳажмини сезиларли даражада кўпайтириш ва Британия бозорида ички товарлар рақобатбардошлигини ошириш имконини беради. Эндиликда ўзбекистонлик ишлаб чиқарувчилар Буюк Британияга тариф имтиёзларидан фойдаланган ҳолда 7 800 дан ортиқ товар позицияларини экспорт қилиши мумкин.
Тизим бўйича ўзбек товарларига имтиёзлар 2021 йил 1 ноябрдан бошлаб қўлланилмоқда.
«Мазкур тизим Буюк Британия ва Ўзбекистон орасидаги муносабатлар қанчалик кенглигига урғу беришга имконият тақдим этади. Тизим айнан савдо, экспорт масалаларига эътиборни қаратади. Шунингдек, Ўзбекистон эскпортёрларига кўпроқ имкониятлар яратилади. Бошқа хизматлар, одамлар эркин, фаровон ва саломат яшаши, Ўзбекистон ва Буюк Британия томонларининг бир қатор соҳаларда ҳам ижобий ўзгариш ва ўсишни кўришимиз мумкин бўлади. Шу жумладан, маданият, таълимда ҳам бу икки давлат ўртасидаги муносабатларни ривожлантиришнинг бир қисми», — дейди у Кенан Полео.
Таъкидланишича, Ўзбекистоннинг GSP Enhanced framework бенефициари мақомига эга бўлиши экспортнинг барқарор ўсиши ва диверсификацияси учун мустаҳкам пойдевор яратади. Маҳаллий экспортчиларга янги бозорларга муваффақиятли чиқиш имконини беради ҳамда Буюк Британия билан ўзаро манфаатли ташқи иқтисодий алоқаларнинг жадал ривожланишига хизмат қилади.
Изоҳ (0)