22 ноябрь куни Душанбе шаҳрида «Европа Иттифоқи—Марказий Осиё» шаклидаги 17-вазирлар учрашуви бўлиб ўтди, деб хабар беради Ўзбекист1он ТИВ матбуот хизмати.
Маълум қилинишича, тадбирда Қозоғистон, Қирғизистон, Тожикистон, Туркманистон, Ўзбекистон ташқи сиёсат маҳкамалари раҳбарлари ҳамда Европа Иттифоқининг ташқи ишлар ва хавфсизлик сиёсати бўйича Олий вакили иштирок этган. Унда Европа Иттифоқи ва Марказий Осиё мамлакатлари ўртасидаги муносабатларнинг долзарб масалалари, хавфсизликнинг умумий муаммолари, савдо, инвестиция, экология соҳаларида ҳамкорликни кенгайтириш истиқболлари, шунингдек, минтақалараро алоқаларни чуқурлаштириш масалаларини муҳокама қилинган.
Ўзбекистон ташқи ишлар вазири Абдулазиз Комилов ўз нутқида Марказий Осиё ва Европа Иттифоқи ўртасидаги ҳамкорликнинг инновацион моделини шакллантириш, узоқ муддатли истиқболда янги ўсиш нуқталарини аниқлаш бўйича қатъий чораларни амалга ошириш муҳимлигини таъкидлаган.
Тарифларни уйғунлаштириш, божхона тартибларини соддалаштириш, барча бизнес субъектлари учун тенг шароитлар яратиш, рақамли технологиялардан самарали фойдаланиш, транспорт-коммуникация лойиҳаларини амалга ошириш орқали ҳудудлараро ва минтақалараро савдо-иқтисодий алоқаларни фаоллаштириш учун кенг имкониятлар мавжудлиги қайд этилган.
«Афғонистонда гуманитар фалокатнинг олдини олиш, мамлакатни минтақавий иқтисодий жараёнларга жалб этиш, афғон томони билан конструктив мулоқотни йўлга қўйиш бўйича тезкор ва ўзаро келишилган чора-тадбирларни амалга ошириш зарурлиги таъкидланди», — дейилади хабарда.
Учрашув иштирокчиларига Ўзбекистон томонидан яшил иқтисодиёт тамойилларини жорий этиш, экология ва биохилма-хилликни сақлаш, табиий ресурслардан оқилона фойдаланиш борасида амалга оширилаётган чора-тадбирлар ҳақида ҳам маълумот берилган.
Ўзбекистон томони Европа Иттифоқи билан ушбу йўналишдаги алоқаларни, жумладан, БМТнинг Оролбўйи минтақаси учун инсон хавфсизлиги бўйича кўпшериклик Trast фонди доирасида ҳамкорликни кенгайтиришга тайёрлиги билдирилган. Учрашув якунида Қўшма коммюнике қабул қилинган.
Аввалроқ Абдулазиз Комилов Ўзбекистон—Европа Иттифоқи ҳамкорлик кенгаши йиғилиши якунлари бўйича журналистларнинг саволларига жавоб берар экан Афғонистондаги бугунги мураккаб вазият ва Ўзбекистоннинг «Толибон» билан муносабати ҳақида тўхталиб ўтганди. «‘Толибон’ нафақат Афғонистондаги асосий куч, балки афғон жамиятининг бир қисмидир. Улар ҳеч қачон миллий чегаралардан ташқарида террорчилик ҳужумларини уюштирмаган. Марказий Осиёда, Европада, АҚШда, Жанубий Осиёда ёки бошқа жойда ‘Толибон’ томонидан уюштирилган терактга бир мисол келтира олмайсиз», — деган эди Комилов.
Изоҳ (0)