Шавкат Мирзиёев 2022 йилда Бельгиянинг Брюссель шаҳрига ташриф буюради. Бу ҳақда Брюссель шаҳрида 16 ноябрь куни бўлиб ўтган Ўзбекистон—Европа Иттифоқи ҳамкорлик кенгаши йиғилиши якунлари бўйича ўтказилган қўшма матбуот анжуманида ташқи ишлар вазири Абдулазиз Комилов маълум қилди.
Қайд этилишича, анжуманда Ўзбекистон—Европа муносабатларининг бугунги ҳолати, қўшма дастурларни амалга ошириш, ҳамкорликнинг янги йўналишлари, шунингдек, бўлажак учрашувлар жадвали юзасидан фикр алмашилган. Кенгайтирилган шериклик ва ҳамкорлик тўғрисидаги битим бўйича музокараларни тезроқ якунлаш муҳимлиги қайд этилган.
«Айтишим мумкинки, биз кенгайтирилган шериклик ва ҳамкорлик тўғрисидаги битимни тайёрлашда ютуқларга эришдик. Келгуси йил президентимизнинг Брюсселга бўлажак ташрифи чоғида ҳужжатни имзолашни режалаштирган ҳолда, битим лойиҳасини яқин вақт ичида якунлаймиз», — деган Абдулазиз Комилов.
Эслатиб ўтамиз, аввалроқ Шавкат Мирзиёев 2021 йил охирида Брюсселга ташриф буюриб, ҳар томонлама шериклик ва ҳамкорлик бўйича янги шартномаларни имзолаши айтилганди.
Изоҳ (0)