Davlat aktivlarini boshqarish agentligi Toshkent viloyati Bo‘stonliq tumanidagi “Chotqol oromgohi” va Toshkent shahar Mirobod tumanidagi Ma’muriy bino (Matbuot uyi) davlat aktivlari bo‘yicha ommaviy savdo jarayonlari boshlanganini e’lon qildi.
Mazkur binolar prezidentning xususiylashtirilishi belgilangan davlat aktivlarini ommaviy savdolarga chiqarish to‘g‘risida e’loni bo‘yicha sotuvga qo‘yilgan. Shuningdek, Toshkent shahar Mirzo Ulug‘bek tumani, Shahriobod ko‘chasi, 53-uy manzilidagi bo‘sh turgan bino-inshootlar ham sotiladi.
Qayd etilishicha, davlat aktivlarini sotish ikki bosqichda o‘tkaziladi. Birinchi bosqichda talabgorlar oldindan saralanadi, jumladan, savdolarda qatnashish uchun talab qilingan hujjatlarning to‘liqligi, zakalat puli kelib tushgani, davlat aktivlaridan kelgusida foydalanish yo‘nalishlariga qo‘yilgan talabga nisbatan talabgor tomonidan taklif etilgan biznes konsepsiyasi loyihasining maqbul yoki maqbul emasligi ko‘rib chiqiladi.
Ikkinchi bosqichda esa talabgorning tijorat takliflari (sotib olish narxi va to‘lovni amalga oshirish muddati), zakalat puli miqdori (narx taklifining kamida 5 foizini tashkil etishi) hamda to‘lov qobiliyati baholanadi.
Ma’lum bo‘lishicha, savdoning birinchi bosqichida ishtirok etmoqchi bo‘lgan yuridik shaxslar 18-dekabr kuni soat 18:00 ga qadar o‘zbek, rus yoki ingliz tilida (talabgorning ixtiyoriga ko‘ra) e’londagi ariza namunasi to‘ldirib, quyidagi hujjatlarning skaner qilingan shaklini “E-auksion” elektron savdo platformasi orqali taqdim etishi kerak:
- yuridik shaxs sifatida ro‘yxatdan o‘tganligini tasdiqlovchi guvohnoma va uning ustavi nusxalari;
- hujjatlar topshirilgan sanaga talabgor, uning ta’sischisi va/yoki benefitsiarining to‘liq ro‘yxat;
- davlat aktivlaridan kelgusida foydalanish yo‘nalishlariga qo‘yilgan talabdan kelib chiqqan holda undan foydalanishning biznes konsepsiyasi loyihasi;
- zakalat pulining maxsus hisob-raqamga o‘tkazilgani to‘g‘risidagi to‘lov hujjati nusxasi.
- soliq to‘lovchining identifikatsiya raqami, pasport ma’lumotlari;
- davlat aktivlaridan kelgusida foydalanish yo‘nalishlariga qo‘yilgan talabdan kelib chiqqan holda undan foydalanishning biznes konsepsiyasi loyihasi;
- zakalat pulining maxsus hisob-raqamga o‘tkazilgani to‘g‘risidagi to‘lov hujjati nusxasi.
“Chotqol oromgohi” Bo‘stonliq tumani Yusufxona ko‘chasi 284-uyda joylashgan. Umumiy maydoni 18 gektarni tashkil etadi, bino inshoot maydoni 7202 metr kvadrat. Mehmonxona yoki boshqa turizm infratuzilmasi obyektini barpo etish uchun mo‘ljallangan.
“Matbuotchilar uyi”ning umumiy maydoni 0,82 gektar bo‘lib, bino-inshoot qismi 18 142 metr kvadratni tashkil etadi. Bu bino sotuvga qo‘yilishining birinchi martasi emas. Mazkur obyekt 2018-yilning aprel oyida ham sotuvga qo‘yilgan edi. O‘shanda Toshkent shahriga yangi tayinlangan Jahongir Ortiqxo‘jayev binoning auksion savdosida sotilishini to‘xtatgan edi.
Keyinchalik, 2019-yil noyabrida Toshkent shahri markazida joylashgan “Matbuotchilar uyi” binosi 18,75 milliard so‘m narx bilan ikkinchi marta auksionga qo‘yilgan. Ammo bu ma’lumot ochiq auksion saytidan olib tashlangan.
Izoh (0)