Жиззахда фуқаронинг норасмий диний фаолият билан шуғулланиши ҳамда диний таълимотдан сабоқ бериш билан боғлиқ ноқонуний фаолиятга чек қўйилди, деб хабар беради вилоят ИИБ ахборот хизмати.
Маълум қилинишича, Жиззах вилояти ИИБ ҳамда ДХХ ходимлари ҳамкорлигида Жиззах шаҳри «Турон» МФЙда яшовчи шахснинг хонадонида ўтказилган тезкор тадбир давомида фуқаронинг ўз турар жойида норасмий диний фаолият билан шуғулланиб, гўёки фуқароларнинг ишларини турли дуолар билан яхшилаш, одамларни сеҳр-жоду қилиш билан шуғулланиб келгани аниқланган.
Ушбу шахснинг хонадони холислар иштирокида кўздан кечирилганда 12 нафар фуқаро мижоз сифатида хонадонга келиб, навбат кутиб тургани маълум бўлган. Хонадон ичидан фуқароларнинг исм-шарифи ёзилган 5 дона иш дафтари топилган. Бу дафтарларда «домла»га келганларнинг юздан ошиқ фотосурати ҳамда ундан сўралган ниятлар ёзилган. Айрим фотосуратлар пичоқ ёрдамида кесилган.
Бундан ташқари, нашриёти кўрсатилмаган диний мазмундаги 5 та китоб, бир дона от қамчиси, 9 дона турли кўринишдаги ош пичоқлари каби нарсалар борлиги аниқланиб, холислар иштирокида ҳужжатлаштириб олинган. Шунингдек, у турли ёшдаги фуқароларга ваколати бўлмаса-да, уйида диний сабоқ берган. Сохта домланинг шогирдлари орасида Фориш туманининг Илонча қишлоғида яшовчи мактаб ўқувчиси ҳам бўлган.
Ниятлар ёзилган дафтарларда кимдир ўзганинг турмуш ўртоғи унга қарашини сўраган бўлса, бошқаси ҳокимликка, яна бири депутатликка даъво қилган. Фуқаролардан бири эса қайнонасининг «жим ўтиришини» сўраган бўлса, яна бири тергов унинг фойдасига ҳал бўлишини билдирган.
Ҳолат юзасидан Маъмурий жавобгарлик тўғрисидаги кодекснинг 201-модда (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) 2-қисми ҳамда 241-моддаси (диний таълимотдан сабоқ бериш тартибини бузиш) билан маъмурий баённома расмийлаштирилган. Тўпланган ҳужжатлар жиноят ишлари бўйича Жиззах судида кўриб чиқилиб, фуқарога нисбатан 10 сутка маъмурий қамоқ жазоси тайинланган.
Эслатиб ўтамиз, аввалроқ Қашқадарёда 13 нафар вояга етмаган болага ноқонуний диний таълим бериш билан шуғулланган она-бола аниқланганди. Шунингдек, Тошкентда вояга етмаганларга ноқонуний диний таълим берган йигит 15 суткага қамалгани ва Тошкентда болаларга ноқонуний диний таълим берган 42 ёшли эркак жаримага тортилгани хабар қилинган.
Изоҳ (0)