Мисрнинг Асуан провинциясида ёмғир ва дўл ёғиши оқибатида дарахтлар қулаб, электр таъминотида узилишлар юз берди. Шунингдек, минтақадаги чаёнларнинг инлари бузилиб, заҳарли ҳашаротлар кўчалар бўйлаб тарқалиб кетди. Бу ҳақда мамлакат соғлиқни сақлаш вазирига таяниб, BBC News хабар берди.
Чаёнлар 500 дан ортиқ кишини чақишга улгурган, улардан уч нафари вафот этган. Мисрда семиз думли чаён (Androctonus crassicauda) яшайди, у энг хавфли чаён турларидан бири ҳисобланади. Унинг заҳари одамни бир соат ичида ўлдириши мумкин.
Тоғлар ва чўлларга яқин қишлоқлардаги тиббиёт марказларига қўшимча дозада заҳарга қарши дорилар юборилган. Ҳукумат аҳолига уйдан чиқмасликни, шунингдек, дарахтлар кўп бўлган жойларга яқинлашмасликни маслаҳат бермоқда, чунки чаёнлар кўпроқ дарахтзорларда учраши мумкин.
Аҳолини коронавирусга қарши эмлаётган шифокорларнинг баъзилари чаёндан заҳарланганларга ёрдам беришга ўтди. Миср Соғлиқни сақлаш вазирлиги чаён чаққан одамларга дарҳол касалхоналарга боришни тавсия қилди, чақиш симптомлари орасида — иситма, мушаклардаги спазмлар, қусиш, диарея ва нафас қисилиши мавжуд.
Изоҳ (0)