ОАВда Путиннинг қизи экани тахмин қилинадиган Катерина Тихонова стартапларга сармоя киритувчи фонд ташкил этмоқда

Россия президенти Владимир Путиннинг кенжа қизи деб тахмин қилинадиган, «Иннопрактика» фонди бош директори Катерина Тихонова ва унинг фонддаги биринчи ўринбосари Наталя Попова «Технологик инвестициялар фонди» инвестицион шерикликни рўйхатдан ўтказиш учун ариза берди. Бу ҳақда венчур капитал бозоридаги манбаларга таяниб, «РБК» хабар берди.

Фонд стартаплар учун дастлабки сармоялар киритишга ихтисослашган бўлиб, уни «ФТИ Инвестицияларни бошқариш» компанияси юритади, деди агентликнинг суҳбатдошлари. «Иннопрактика» матбуот хизматининг қўшимча қилишича, ҳар бир лойиҳага уч миллион рубль (41,1 минг доллар)га яқин сармоя киритиш режалаштирилмоқда.

2021 йилнинг июнь ойида Санкт-Петербург халқаро иқтисодий форуми сессиясида сўзга чиққан Катерина Тихонова «инвестициялар учун фан-техника соҳаси, хусусан, илғор технологиялар алоҳида қизиқиш уйғотиши мумкин»лигини таъкидлаган.

«Иннопрактика» фонди 2012 йилда Москва давлат университети томонидан ташкил этилган. Уни Катерина Тихонова бошқарган. Тихонова ҳозирда Москва давлат университети қошидаги Мураккаб тизимларни математик тадқиқот қилиш институти директорининг ўринбосари лавозимида ишлайди. «Иннопрактика» 2015 йилда, унинг Москва давлат университетини кенгайтириш бўйича кўп миллиард долларлик лойиҳада иштирок этаётгани маълум бўлгач, кенг танилди.

Маълумот учун, бир қатор Россия ва халқаро оммавий ахборот воситалари, жумладан, Reuters ва Bloomberg агентликларининг маълумотларига кўра, Катерина Тихонова — Владимир Путиннинг кенжа қизи. АҚШ Молия вазирлиги ҳам 2018 йил 6 апрелдаги расмий пресс-релизда уни Путиннинг қизи деб атаган. Путиннинг ўзи эса хавфсизлик масалаларини баҳона қилиб, оиласи ҳақида суҳбатлашишдан бир неча бор бош тортган.