Бирлашган Миллатлар Ташкилотининг Қочқинлар бўйича Олий комиссарлиги 2021 йил июнь—июль ойлари ҳолатига кўра, дунёдаги қочқин ва муҳожир аҳоли сонини маълум қилди, деб хабар бермоқда «Интерфакс».
Қайд этилишича, дунё бўйлаб қочқин, ички кўчирилган ва бошқа мамлакатдан бошпана сўраган аҳоли сони 84 миллион нафардан ошган.
«Халқаро ҳамжамият одамлар уйларини ташлаб кетишга мажбурлаётган зўравонлик, таъқиблар ва инсон ҳуқуқлари бузилишининг олдини ололмаяпти», — деган БМТнинг Қочқинлар бўйича олий комиссари Филиппо Гранди.
Маълум бўлишича, бу борадаги рекорд кўрсаткич – 2020 йилга нисбатан 2 миллионга ошган. Хусусан, 2021 йил июль ойи бошига келиб 26,5 миллион киши қочқин мақомига эга бўлган, жумладан, 6,6 миллион суриялик, 5,7 миллион фаластинлик ва 2,7 миллион афғонистонлик.
Шунингдек, дунёда 4,4 миллион киши бошпана изловчи сифатида рўйхатга олинган. Бирлашган Миллатлар Ташкилоти ҳисоботига кўра, 2021 йил июнь ойи охирига келиб, дунё бўйлаб мамлакат ичи бўйлаб кўчирилганлар сони 51 миллионни ташкил этган.
Шу билан бирга, 2021 йилнинг биринчи ярмида Африкада кўчирилганлар сонининг ўсиши кузатилган. Эфиопия ва Конго Демократик республикасидаги можаролар ушбу мамлакатларнинг ҳар бирида 1 миллиондан ортиқ одамни муҳожир бўлишга мажбур қилган. Худди шундай муаммолар Мьянма, Афғонистон, Мозамбик ва Жанубий Суданда ҳам кузатилган.
Умуман олганда, 2021 йилнинг январь — июнь ойларида 4,3 миллиондан ортиқ киши ички кўчирилган мақомини олди. Бу 2020 йилнинг биринчи ярмига нисбатан 50 фоизга кўп. Бироқ 2021 йилнинг биринчи олти ойида салкам 1 миллион киши ўз уйига қайтишга муваффақ бўлган.
Эслатиб ўтамиз, АҚШда 2021 йил қочқинларни қабул қилиш квотаси 15 мингдан 65 минггача оширилгани, кейинроқ кўрсаткич икки баравар оширилиб, 125 минг киши этиб белгилангани хабар қилинганди.
Изоҳ (0)