АҚШда мажбурий эмлашга қарши ҳаракат рамзига айланган Иллинойс штатидаги ўқитувчи Каденс Коэн бир неча ой олдин коронавирусга қарши эмланганини тан олди. Бу ҳақда Independent нашрига таяниб, «Комсомольская правда» хабар қилди.
Маълум бўлишича, штатнинг Спрингфилд шаҳридаги ўрта мактабнинг математика фани ўқитувчиси Каденс Коэн COVID-19 га қарши мажбурий эмланиш ва ПЗР тести топширишдан бош тортиб, машҳурликка эришган. У расмийлар талабига бўйсунмаслик учун тўловсиз таътилга чиқишга (иш ҳақи сақланмаган ҳолда) ҳам рози бўлган.
Шундан кейин у Иллинойс ва бутун АҚШда коронавирусга мажбурий вакцинациялашга қарши «Менинг танам — менинг танловим» шиори остидаги ҳаракат рамзига айланди.
Яқинда эса Коэн шерикларига қаттиқ «зарба бериб», аслида ёз фаслида вакцина қабул қилганини маълум қилди. У эмлаш сертификатини мактаб маъмуриятига юборди ва унинг расмини Facebook ижтимоий тармоғидаги саҳифасига юклади.
У ўз ҳаракатига изоҳ берар экан, ҳеч қачон эмлашнинг ўзига қарши норозилик билдирмагани, аксинча, унинг мажбурий шаклига эътироз билдиришини айтган. Аёл ўз иш жойини йўқотиш хавфи уни масалага муносабатини қайта кўриб чиқишга мажбур қилганини тан олган.
«Мен эмлаш сертификатини кўрсатишни хоҳламагандим, чунки бу мақсадга мувофиқ эмас. Лекин сиз менинг шахсий қарашларим ва ўқувчиларимдан бирини танлашим кераклигини сўрасангиз, ўқувчиларимни танлайман. Мен ҳаётни ўқитувчиликсиз тасаввур эта олмайман», — деган у.
Эслатиб ўтамиз, АҚШнинг Калифорния штатида COVID-19 пандемияси даврида одамларнинг эмланишига қарши курашган 34 ёшли блогер Стивен Гармон коронавирусдан вафот этганди. Шунингдек, Португалияда эмланишга қарши бўлган оила коронавирус асоратлари оқибатида ҳаётдан кўз юмган.