Чехия ҳукуматининг раҳбари Андрей Бабиш 11 ноябрь куни истеъфога чиқиш тўғрисида ариза берди.
«Ҳукумат истеъфога чиқишга қарор қилди. Мен президентга истеъфо тўғрисидаги аризани юбордим, президент уни қабул қилди», — дея Бабишнинг сўзларини келтиради Чехия радиоси.
Хабарга кўра, энди мамлакат президенти Милош Земан ўз лавозимини тарк этаётган вазирларга янги Вазирлар Маҳкамаси шакллантирилмагунча ўз ваколатларини амалга оширишни сўраб мурожаат қилиши керак.
Шу ҳафта бошида Земан Фуқаро демократик партияси етакчиси Пётр Фиалега янги Чехия ҳукуматини шакллантириш бўйича кўрсатма берганди. 8 ноябрь куни Прагада ҳукумат коалициясини тузиш бўйича келишувга эришилди.
Коалиция тўғрисидаги келишувга Фуқаро демократик партияси, Христиан демократик иттифоқи, «Биргаликда» альянси билан коалициядаги «ТОП 09» (марказий ўнгчилар) партияси ва «СТАН» ҳаракати билан коалициядаги Пиратлар партияси вакиллари имзо чекди.
Янги Вазирлар Маҳкамасининг таркиби 18 вазир, жумладан, бош вазирга айланадиган Фиаледан иборат бўлиши кутилмоқда. 57 ёшли Фиале бунгача таълим, ёшлар ва жисмоний тарбия вазири лавозимларида ишлаган. У 2013 йилдан бери парламент депутати ҳисобланади.
Октябрь ўртасида Чехия Сенатининг Конституциявий комиссияси Милош Земандан президентлик ваколатларининг бир қисмини олиб ташлаш имкониятини кўриб чиққан эди. Бунга Земаннинг қайта-қайта касалхонага ётқизилиши сабаб бўлган.
77 ёшли Милош Земан 10 октябрь куни Прагадаги Марказий ҳарбий касалхонага ётқизилди. Шифокорлар унга қўйилган ташхисни ошкор қилмади.
Бундан аввал Земан сентябрь ойида саккиз кун Марказий ҳарбий касалхонага ётқизилган эди. Прага қалъаси буни режалаштирилган муолажа деб айтган. Сиёсатчи диабет ва оёқларнинг невропатияси билан касалланган, у ногиронлар аравачасида ҳаракатланади.