Тошкент вилояти Экология ва атроф-муҳитни муҳофаза қилиш бошқармаси ижтимоий тармоқларда Бўстонлиқ тумани Оқтош қишлоғи ҳудудида 53 туп кўп йиллик дарахтлар ноқонуний кесилгани юзасидан тарқалган хабарларга муносабат билдирди.
Экология ва атроф-муҳитни муҳофаза қилиш соҳасидаги назорат бўйича Бўстонлиқ тумани инспекцияси ходимлари томонидан олиб борилган ўрганиш ишлари давомида ҳудудда ўсиш ҳолатида бўлган жами 56 туп, шундан, 53 туп шумтол, 2 туп бақатерак, 1 туп қизил дўлана дарахтлари ноқонуний равишда кесилгани аниқланган.
Ҳолат юзасидан холис гувоҳлар иштирокида белгиланган тартибда далолатнома расмийлаштирилган. Таъкидланишича, номаълум шахсларнинг ғайриқонуний хатти-ҳаракатлари натижасида ўсимлик дунёсига 288 миллион 792 минг сўм миқдорда зарар етказилган.
«Ҳолат юзасидан расмийлаштирилган ҳужжатлар қонуний баҳо бериш учун прокуратура органларига тақдим этилди», — дейилади муносабатда.
Ўз навбатида Бош прокуратура матбуот хизмати мазкур дарахтларнинг ноқонуний кесилгани ҳолати бўйича Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилганини маълум қилди.
Эслатиб ўтамиз, Президент Шавкат Мирзиёев раислигида 2 ноябрь куни аҳолини уй-жой билан таъминлаш ҳамда яшил майдонларни кенгайтириш чора-тадбирлари муҳокамаси юзасидан видеоселектор йиғилиши ўтказилганди. Йиғилишда 10 декабрга қадар дарахт экиш бўйича «Долзарб 40 кунлик» эълон қилинган. Ўрмон хўжалиги давлат қўмитасига ҳокимлар билан бирга, ҳар бир ҳудуднинг иқлим шароитига мос кўчатларни кўпайтириш ва етказиб бериш вазифаси қўйилган эди.
Изоҳ (0)