Самарқанд вилоят ҳокими Эркинжон Турдимов 11 октябрь куни тиббиёт соҳаси масъуллари билан учрашув чоғида вилоят аҳолисига соҳадаги камчиликлардан огоҳлантириш бўйича мурожаат қилди. Бу ҳақда ЎзА хабар берди.
«Тиббиёт соҳасини яхшилаш, мавжуд камчиликлар, таъмагирликлар, эътиборсизлик оқибатида юзага келаётган салбий ҳолатлар бўйича маълумотларингизни 97 405 40 09 Telegram рақамига йўллашингизни сўрайман», — деган Эркинжон Турдимов.
Қайд этилишича, ушбу маълумотлар асосида соҳадаги режаларга ўзгартиришлар киритилиб, тасдиқланган фактлар бўйича хулоса қилинади.
«Бугун тиббиёт соҳасини халқимиз, кенг жамоатчилик назоратисиз, улар билан бевосита мулоқотсиз ўзгартириб бўлмайди. Соҳада таъмагирликлар, таниш-билишчиликлар, кўплаб нотўғри ишлар бўлаётгани ҳеч кимга сир эмас. Фақат биргалашиб, бундай ҳолатларнинг олдини олишимиз мумкин», — дея қўшимча қилган вилоят ҳокими.
Эслатиб ўтамиз, Эркинжон Турдимов ноябрь ойи аввалида вилоятдаги 3 нафар ҳоким ва 20 нафар ҳоким ўринбосарига қатъий огоҳлантириш ҳамда ҳайфсан интизомий жазо чораларини қўллаганди. Улар Давлат хизматини ривожлантириш агентлиги барча вилоят, туман ва шаҳарлардаги ҳоким ва ҳоким ўринбосарлари фаолиятини энг муҳим самарадорлик кўрсаткичлари (ЭМСК, KPI) асосида баҳолаш тизимида паст натижа қайд этган.
Шунингдек, 30 апрель куни вилоят ҳокими Эркин Турдимов иштирокида ҳудуддаги мактабгача таълим ташкилотлари фаолиятига бағишланган йиғилиш бўлиб ўтган. Унда вилоят Мактабгача таълим бошқармаси бошлиғи фаолиятига қониқарсиз баҳо берилган.
Изоҳ (0)