Тошкентда бир қатор туманларнинг газ таъминотини яхшилашга ёрдам берадиган янги газ тақсимлаш тармоғи қурилиши якунланди

Тошкентда газ тармоқларининг кенг қамровли реконструкцияси якунланди, деб хабар бермоқда «Ҳудудгазтаъминот» матбуот хизмати.

Эслатиб ўтамиз, Тошкент шаҳрида газ таъминотини яхшилашга хизмат қилиши айтилган газ қувурини қуриш ишлари 2020 йил охирларида бошланган эди.

«Диаметри 1020 миллиметр ва узунлиги, тахминан, 8 километрга тенг бўлган газ қувурининг ишга туширилиши пойтахт аҳолиси учун катта воқеа бўлди. Бу каби объектни барпо этиш ишлари Ўзбекистонда кейинги 40 йил ичида амалга оширилмаган. Янги йил арафасида бошлаб юборилган қурилиш бир неча ойда якунланиши керак эди, лекин олиб борилган катта маърифий ишлар ҳисобига жараён бироз мураккаблашди.

Хусусан, ушбу объект қурилишига норози бўлган фуқаролар билан бир неча бор учрашувлар ўтказилди. Мутахассислар уларга олиб борилаётган ишларнинг моҳиятини ва янги объектнинг афзалликларини батафсил изоҳлаб берди», — дейилади хабарда.

Маълум қилинишича, бугунги кунга келиб ушбу объект фойдаланишга топширилди. Тошкент газ таъминоти тизими ягона ҳалқага уланганлиги туфайли, аҳолига газ узатиш самарадорлиги сезиларли ошди. Пойтахтда яшовчи қарийб 100 минг истеъмолчиларнинг газ таъминоти яхшиланди. Ўрикзор, Чўпонота, Оқтепа, Изза, Samarqand Darvoza, Зангиота, Сузук ота, Новза ва шу каби бошқа йирик маҳалларда газ таъминотидаги муаммолар ҳал этилди.

Қиш вақтида табиий газ таъминотидаги узилишлар Тошкент шаҳри Шайхонтоҳур туманидаги бир неча маҳалларда кузатилган эди. Хусусан, «Катта ҳовуз» МФЙ ҳудудидаги 305 та уйлар яшовчилари кейинги бир неча йил давомида газ таъминоти ташкилотларига газ босимининг пастлиги юзасидан шикоят қилиб келган. Ушбу муаммонинг асосий сабаби 30 йилдан ортиқ ишлатиб келинаётган ва анча эскириб қолган газ тақсимлаш пунктларига тақалади.

2021 йилда «Ҳудудгазтаъминот» Италиянинг Pietro Fiorentini компанияси билан ҳамкорликда ушбу муаммо мавжуд ҳудудда тажриба-синов лойиҳасини амалга оширишга киришди. Бу ерда реал вақт режимида табиий газ истеъмолчиларга узатилишининг барқарорлиги устидан кузатиб туришга имкон яратадиган тўртта замонавий газ тақсимлаш пунктлари ўрнатилди.

Бундай янги тажриба натижалари бўйича замонавий ГТПларни Тошкентнинг бошқа туманларида ҳам ўрнатиш режалаштирилаётгани қайд этилган.