Ўзбекистонда олий таълим ва қурилишни коррупциясиз соҳага айлантириш бўйича «йўл харитаси» ишлаб чиқилади

9 ноябрь куни Ўзбекистон коррупцияга қарши курашиш миллий кенгаши мажлиси бўлиб ўтди, деб хабар беради Олий Мажлис Сенати матбуот хизмати.

Тадбирни Олий Мажлис Сенати раиси, Коррупцияга қарши курашиш миллий кенгаши раиси Танзила Норбоева кириш сўзи билан очиб берган. Йиғилиш давомида олий таълим, соғлиқни сақлаш, капитал қурилиш ҳамда давлат харидлари соҳаларини коррупциясиз соҳага айлантириш бўйича «йўл харита»лари қабул қилиниб, улар устидан таъсирчан парламент назорати ўрнатилгани таъкидланган.

Хусусан, олий таълим ва капитал қурилиш соҳаларидаги бир қатор тартиб-таомиллар соддалаштирилган, инсон омили камайтирилган, айрим хизматларнинг рақамлаштирилиши ҳисобига коррупциявий ҳолатларни келтириб чиқарувчи омиллар бартараф этилган.

Йиғилишда давлат раҳбарининг 2021 йил 6 июлдаги фармони билан тасдиқланган Коррупцияга қарши курашиш бўйича 2021—2022 йилларга мўлжалланган Давлат дастурида белгиланган вазифаларнинг ижроси муҳокама қилинган.

Мажлисда олий ва ўрта махсус таълим ҳамда қурилиш вазирларининг ҳисоботлари эшитилиб, олий таълим ва капитал қурилиш соҳаларини коррупциясиз соҳага айлантириш бўйича 2022—2023 йилларга мўлжалланган «йўл харитаси»ни ишлаб чиқиш вазифаси топширилган.

Маълум қилинишича, Жаҳон одил судлов лойиҳаси томонидан юритиладиган Ҳуқуқ устуворлиги индексининг 2021 йил ҳисоботида Ўзбекистон 19 поғонага, 139 та мамлакат орасида 89-ўриндан 70-ўринга кўтарилган.

Йиғилишда кун тартибига киритилган бошқа масалалар ҳам муҳокама қилиниб, тегишли қарор қабул қилинган.

Эслатиб ўтамиз, Шавкат Мирзиёев 2020 йил 24 январда Олий Мажлисга йўллаган мурожаатномада коррупциянинг оқибатлари билан курашишдан кўра барвақт олдини олишга ўтиш кераклигини таъкидлаб, унга қарши курашишга масъул бўладиган алоҳида орган тузишни таклиф қилган эди. 2020 йилнинг 11 февралида мазкур органни ташкил этиш масалалари бўйича Президент раислигида йиғилиш бўлиб ўтганди. Шу йилнинг июнида эса «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги фармонга мувофиқ, Коррупцияга қарши курашиш агентлиги ташкил этилган эди.