Бугун,

  • USD 11095.31
  • RUB 173.84
  • EUR 10772.44

Олий Мажлис Қонунчилик палатаси депутати Дониёр Ғаниев ўзининг Telegram’даги канали орқали 2022 йил учун Бюджет лойиҳаси ишлаб чиқилиши кечикаётганини маълум қилди.

Фото: «Дарё» / Мадина Нурман

Фото: «Дарё» / Мадина Нурман

Ғаниевнинг ёзишича, Бюджет кодексининг 97-моддасига асосан, Давлат бюджети тўғрисидаги қонун лойиҳаси ва бюджетнома Вазирлар Маҳкамаси томонидан Олий Мажлис палаталарига, қоида тариқасида, 2021 йилнинг 15 октябридан кечиктирмай киритилиши белгиланган. Лекин 2021 йил 9 ноябрь ҳолатига, яъни белгиланган муддатдан 25 кун ўтган бўлса-да, бюджет лойиҳаси ва бюджетнома Қонунчилик палатасига киритилгани йўқ.

Шунингдек, Бюджет кодексига ўтган йили киритилган ўзгартиришларга асосан, келгуси йил учун янгиланган ўрта муддатли давр фискал стратегияси Вазирлар Маҳкамаси томонидан жорий йилнинг 15 июнига қадар тасдиқланиши ва тасдиқланган фискал стратегия маълумот учун Олий Мажлис палаталарига тақдим этилиши ҳамда жамоатчилик учун Молия вазирлиги веб-сайтида эълон қилиниши белгиланган.

«Белгиланган муддатдан деярли 5 ой ўтган бўлсада, ўрта муддатли фискал стратегия на Олий Мажлис палаталарига киритилган, на Молия вазирлиги веб-сайтида эълон қилинган. Ўзи умуман, 2022 йил учун янгиланган фискал стратегия Молия вазирлиги томонидан ишлаб чиқилганми ёки йўқ — бу ҳам номаълум», — деб ёзади депутат.

Дониёр Ғаниев 2021 йилда мамлакат президентлигига сайлов ўтказилгани ва ғолиб номзод томонидан сайловолди дастурда илгари сурилган масала ва режалар янги бюджет лойиҳасида ўз аксини топиши нуқтаи назаридан 2022 йил учун бюджет лойиҳасини ишлаб чиқиш кечикиши табиий ҳоллигини қайд этган. Лекин шунга қарамай, унинг таъкидлашича, бюджет лойиҳасини Олий Мажлис палаталари томонидан кўриб чиқилиши учун ҳам етарлича вақт берилиши керак.

«Гарчи амалда депутатлар бюджет лойиҳаси параметрларига жиддий ўзгартириш ёки қўшимча киритолмасалар-да, лекин бюджет муҳокамаси учун Бюджет кодексида белгилангандек, қоида тариқасида, Қонунчилик палатасига ҳам камида бир ой муддат қолдирилиши керак. Умид қиламанки, бюджетномани киритишда кечикилган вақт уни Олий Мажлис палаталарида кўриб чиқиладиган муддатни қисқартириш ҳисобига қопланмайди», — дея қайд этади Ғаниев.

Маълумот учун, Президент Шавкат Мирзиёев 2021 йил учун давлат бюджетини 2020 йилнинг декабри охирида тасдиқлаганди. Унга кўра, 2021 йилда мамлакат иқтисодиёти одатдаги кўрсаткичларига қайтиши тахмин қилинганди — ялпи ички маҳсулот (ЯИМ) 688,9 триллион сўмни, ўсиш суръати эса 5,1 фоизни ташкил этиши керак эди.

Аввалроқ Дониёр Ғаниев иккиламчи бозордаги автомобиллар олди-сотдисидаги божларни пасайтиришни сўраб депутатлик сўрови юборгани, мазкур сўровга Молия вазирлиги 2022 йил бюджет параметрларини шакллантиришда автотранспорт воситаларини сотиб олганлик учун ундириладиган йиғимларни бекор қилиш кўзда тутилаётганини маълум қилгани тўғрисида хабар берилганди.

Изоҳ
Асосий янгиликлар
Маҳаллий
«Дарё» кундалигида 2 декабрда содир бўлган энг муҳим воқеалар
Маҳаллий
«Ифлослантирувчи тўлайди» тамойили, «яшил сертификатлар», энергия улушини камайтириш: Мирзиёев «яшил» иқтисодиёт тақдимоти билан танишди
Дунё
Британия разведкаси Россия Украинадаги урушда қуруқликдан ҳужум қилолмаётгани сабабини тушунтирди