Давлат активларини бошқариш агентлиги Тошкентдаги йирик кўчмас мулк объектларидан бирини сотувга қўйди. Бу ҳақда «E-auksion.uz» маълумотларида келтирилган.
Гап Чилонзор туманидаги «Тирсакобод» маҳалласида жойлашган 60-сонли ҳарбий шаҳарча ҳақида кетмоқда. 1940 йилда қурилган объект Вазирлар Маҳкамасининг 26 августдаги тегишли қарорига кўра сотувга чиқарилмоқда.
Маълумотларга кўра, ушбу объект 27,86 гектар ҳудудни эгаллаган, ундаги бино ва иншоотларнинг умумий майдони 29,8 минг квадрат метрга тенг. Барча коммуникация — электр энергияси, газ, сув таъминоти ва канализация мавжуд. Объект ҳудудида қоровулхона, бир нечта бостирма, ошхона, маъмурий бино, омборхона, устахона, гараж, резервуарлар жойлашган.
Сотувга қўйилган объектнинг бошланғич нархи 204,9 миллиард сўмни ташкил этади. 13 декабрга қадар давом этадиган савдоларда иштирок этишни истаганлар 11 декабрга қадар ариза бериши мумкин.
Аввалроқ МИБ Бўстонлиқда аукционга қўйган дала ҳовли учун 7,7 миллиард сўм бошланғич нарх белгилангани, Ўзбекистон Мудофаа вазирлигининг фойдаланилмаётган автомототранспортлари сотувга қўйилиши тўғрисида хабар берилганди.
Изоҳ (0)