Кўз ёшларни тийиш мушкул: «Форсаж» юлдузлари Вин Дизель ва Пол Уокернинг дўстлик ҳикояси

«Форсаж» юлдузлари нафақат экранда, балки реал ҳаётда ҳам яқин дўст бўлган. Марҳум Пол Уокернинг ёлғиз қизи Мидоу турмушга чиққанда уни меҳробга Вин Дизель олиб боргани бунга исбот бўла олади. Улар бир-бири билан қанчалик яқин эди? Қуйида ушбу саволга жавоб бериб ўтамиз.

Эркаклар ўртасидаги қалин дўстликка нисбатан bromans атамаси ишлатилади. Бу шунчалик яқинлигидан бир-бирини ака-ука деб билиш ва уларнинг оиласи ҳам дўстлашиб кетганини англатади. Пол Уокер ҳамда Вин Дизельнинг ўртасидаги дўстлик ана шундай бўлган ва бу алоқалар ҳатто Полнинг вафотидан кейин ҳам ўзгармаган. Уокер ўлган, аммо унинг Дизель билан дўстлиги яшашда давом этган.

Экрандан ҳаётга кўчган дўстлик

«Форсаж» фильми 2001 йил экран юзини кўриши биланоқ суперхитга айланган. Унда икки бош қаҳрамон: Торетто ва Брайан O’Коннорни гавдалантирган Вин Дизель ва Пол Уокер қалин дўст бўлиб қолган, янги франшизалар суратга олингани сайин эса оилавий алоқалари ҳам тобора яхшиланган. Экранда дўстлар ролини ўйнаган актёр ва актрисалар ҳаётда шунчаки яқин таниш бўлади. Вин ва Пол эса чиндан ҳам дўстлашиб, суратга олиш майдончасида яхши мулоқот қила бошлаган. Уларнинг самимий, очиқ ва яқин дўстона муносабатларига ҳавас қилса арзирди.

Бир-бирига ишонган тоғ

2008 йилда Дизельнинг ҳаётида ўзига хос бурилиш бўлган. Бунга «Форсаж»нинг иккита қисмида суратга тушмагани эмас, ота бўлишга тайёргарлик кўргани сабаб бўлган. Вин ўша вақтда севгилисининг ёнида бўлишни афзал деб билиб, суратга олиш ишларидан бироз узоқлашган. Бундай осон бўлмаган даврда Уокер Дизельга елкадош бўлган.

«Пол менинг олдимга келиб, мен билан нима бўлаётгани нега бундай асабийлигим ҳақида сўраган. Мен туғруқ жараёни қандай кечиши ҳақида ҳаяжонланаётганимни тушунтирганман, ахир бу менинг биринчи фарзандим эди. У менинг кўзларимга боқиб, сен бу ерда ҳамма нарсани ташлаб, зудлик билан рафиқангни ёнига боришинг, унинг ёнида бўлишинг ва қизингнинг дунёга келишини кўришинг керак деган. Полнинг гапига кирганман, мен фақат акамнинг гапигагина шундай қулоқ солишим мумкин эди. Суратга олиш майдончасини тарк этдим ва қизимнинг туғилиш жараёнида иштирок этдим. Унда нафас олиши билан боғлиқ муаммолар бўлган. Тафсилотларни айтишни истамайман, аммо агар ўша вақтда қизимнинг ёнида бўлмаганимда, ўзимни ҳеч қачон кечирмаган бўлардим. Ўша маслаҳати учун Полдан бағоят миннатдорман», – деган Дизель. Актёр дўстининг бу гапларидан хулоса қилиб, ҳаётда нималар муҳимлиги-ю, нималар аҳамиятсиз эканини танлашни ўрганган.

Кундан-кунга Вин ва Полнинг дўстлиги тобора мустаҳкамлашган. Уокернинг онаси ҳам уйида ўғлининг яқин дўстини кўришдан ҳамиша мамнун бўлган. «Улар соатлаб суҳбатлашиши, нафақат суратга олиш ишлари билан боғлиқ икир-чикирларни, балки бошқа нарсаларни ҳам муҳокама қилиши, ҳаёт билан боғлиқ турли вазиятларни эслаши, навбатдаги таътил ёки дам олишни режалаштириши, биргалашиб бирон нима устидан кулиши мумкин эди», — деб эслайди Уокернинг онаси Шерил.

«Форсаж»нинг қолган қаҳрамонлари ҳам айнан Вин ва Пол сабаб дўстлашиб, ҳақиқий оиладек бўлиб кетганини таъкидлади. Улар бошқаларнинг келиб чиқиши, қарашлари ва феъл-атвор турли эканидан ташқари дўстлашишга ўргатган.

Сўнгги нафасгача

2013 йили 1 декабрь куни 40 ёшга тўлганига кўп бўлмаган Пол Уокер, автоҳалокатда вафот этган. Фожиа ҳақида хабар топган Вин, ўша вақтнинг ўзидаёқ самолётга ўтириб, вафот этган дўстининг онасининг олдига етиб борган. «Ичкарига киришга қарор қилолмай, орқа ҳовлида туриб йиғлаганман. Дўстимнинг онаси мени кўриб, ташқарига чиққан ва таскин беришга ҳаракат қилган. Мен йиғлаганча, аслида мен сизни овунтиришим керак, ахир унинг онаси сизсиз, деганман. Бунга жавобан у: Сен унинг иккинчи ярми эдинг, деб жавоб берган», — деб эслайди Дизель.

Ўзининг хайрлашув постида Дизель, у учун буюк ва ҳақиқий дўстлик даври тугаганини ёзган. Уокернинг дафн маросимидан кейин Дизель бирданига йўқ бўлиб қолган. На кўчада, на ижтимоий тармоқларда кўринган, ҳатто карьерасида ҳам танаффус кузатилган. Пол бир нечта эпизодларида суратга тушиб улгурган «Форсаж»нинг еттинчи қисмини суратга олиш жараёнлари ҳам тўхтатилган.

Суратга олиш ишларининг 4 ойга қолдирилиши, миллионлаб маблағ тикилган ва кўплаб мухлислар интиқиб кутаётган фильм ижодкорлари учун осон бўлмаган. Фильмнинг тақдимоти қолдирилгани уларнинг ўзига келиб олиши имконини бергани таъкидлаган Вин, ўша вақт ҳаётидаги энг кўп кўз ёш тўкканини қўшимча қилган.

Дўстлик ва фарзандлар 

2015 йил 16 мартда Вин яна бир марта фарзандли бўлган. Дунёга келган қизалоқни марҳум дўстининг шарафига Полин деб исм қўйди. «Қизим дунёга келганида, уни дўстим ва акамдек бўлган инсоннинг шарафига номлашим кераклигини англаганман. Биз «Форсаж»нинг биринчи қисмиданоқ Пол билан бир-биримизни шундай атагандик. Ўша онда унинг ёнимда эканини ҳис қилганман», — деган Вин.

https://www.instagram.com/p/COqxI2KDCkI/?utm_source=ig_embed&utm_campaign=embed_video_watch_again

Полнинг қизи Мидоу эса асло ёлғиз қолмаган. Дизель унга отасининг йўқлигини билдирмасликка ҳаракат қилган. Улар ўртасида илиқ муносабатлар йиллар ўтгани сайин мустаҳкамланган. Қиз ҳар йили Дизельни туғилган куни билан табриклашни унутмайди, Вин эса у учун муҳим бўлган кунларни асло ўтказиб юбормайди. 2019 йилги табригида Дизель, Мидоу билан фахрланиши, уни яхши кўриши ва қадрлашини ёзиб қолдирган.

2021 йил 22 яшар Мидоу турмуш қурган. Доминиканда бўлиб ўтган тўй пандемия сабаб ихчам ўтказилган. Мидоу турмуш ўртоқ сифатида актёр Луи Торнтон-Алланни танлаган. Пол Уокернинг қизининг тўйи ижтимоий тармоқларда кўплаб муҳокамаларга сабаб бўлган. Кўпчилик Доминик Торетто билан боғлиқ, оиланинг нақадар муҳимлиги ҳақидаги мемни эслаган.