Ўзбекистон Мудофаа вазирлиги ижтимоий тармоқларда тарқалган Олмалиқ шаҳрида ҳарбий хизматчининг аёл кишига қўл кўтаргани тасвирланган видеога муносабат билдирди.
Ижтимоий тармоқларда Тошкент вилояти Олмалиқ шаҳар мудофаа ишлари бўлими бошлиғи дея айтилаётган ҳарбий хизматчи буюм бозорида аёл кишига қўл кўтаргани акс этган видео тарқалди. Видеодан кўриш мумкинки, можаро аёл ўз фарзандининг сафарбарлик чақирув резервида (бир ойлик армия) бир ойлик йиғинларда иштирок этиши учун шартнома пулини тўламаётгани сабаб келиб чиққан.
Вазирлик матбуот хизматининг маълум қилишича, ҳозирда Тошкент ҳарбий округи қўмондонлиги ва Ҳарбий прокуратура мазкур ҳолат юзасидан суриштирув ишларини бошлаган.
«Текширув натижаси юзасидан қўшимча хабар берилади. Ҳолат Мудофаа вазирлиги томонидан назоратга олинган», — дейилади хабарда.
Аввалроқ Ўзбекистонда ижтимоий ҳимояга муҳтож ёшларнинг «бир ойлик хизмат»ни ўташ бадали қоплаб берилиши маълум қилинганди.
Изоҳ (0)