Президент Шавкат Мирзиёев «Юриш, югуриш, мини-футбол, бадминтон, стритбол ва Workout спорт турларини янада ривожлантириш чора-тадбирлари тўғрисида»ги қарорни имзолади, деб хабар беради ЎзА.
Қарорга кўра, Молия вазирлиги «Соғлом турмуш тарзи» платформаси орқали амалга ошириладиган тўловларни 2022 йил учун давлат бюджети параметрларида назарда тутилишини ҳамда 2022 йил 1 январдан бошлаб давлат бюджети маблағлари ҳисобидан уларни тўлиқ ҳажмда тўлаб берилишини таъминлайди.
2022 йил 1 январга қадар «Соғлом турмуш тарзи» платформасини такомиллаштиради, шу жумладан, ахборот дастурида фуқаролар томонидан белгиланган масофани ҳақиқатда босиб ўтганини тасдиқловчи механизмларни қайта кўриб чиқади.
Шунингдек, қарорга кўра ҳокимликлар спорт майдончаларининг фойдаланиш хусусиятини йўқотмаган ҳолда ва тегишли жойлашувига кўра маҳалла фуқаролар йиғини ёки уй-жой мулкдорлари ширкатларига текин фойдаланиш ҳуқуқи асосида беради.
Эслатиб ўтамиз, Вазирлар Маҳкамасининг 2021 йил 28 апрелдаги «Соғлом турмуш тарзи» платформаси фаолиятини ташкил этиш чора-тадбирлари тўғрисида»ги 253-сонли қарорига мувофиқ, аҳолини кунлик юриш ва югуришга тарғиб қилиш бўйича «Соғлом турмуш тарзи» платформаси, яъни «1hls.uz» веб-саҳифаси ҳамда мобил иловаси ишга туширилганди. Сентябрь ўрталарига келиб, «1hls.uz» мобил иловаси фойдаланувчиларига пул тўлашни вақтинча тўхтатган.
Бундан аввал Ўзбекистон аҳолиси июль ойида пиёда юриш орқали қарийб 69 млн сўм ишлаб топгани ҳамда Ўзбекистонда июнь ойида энг кўп пиёда юрган деб топилган фуқаро 1,8 млн сўм билан мукофотлангани ҳақида хабар берилганди.
Изоҳ (0)