Президент Шавкат Мирзиёев Қозоғистоннинг Қарағанда вилоятидаги конда содир бўлган портлаш оқибатида инсонлар қурбон бўлгани муносабати билан мамлакат президенти Қосим-Жўмарт Тўқаевга ҳамдардлик билдирди. Бу ҳақда президент матбуот котиби Шерзод Асадов маълум қилди.
7 ноябрь куни «АрселорМиттал Темиртау» компаниясига қарашли «Абай» шахтасида тўсатдан метан ажралиб чиқиши содир бўлган. Олти ишчи ҳалок бўлди, яна икки киши яраланган. Конда жами 64 нафар ишчи ишлаган бўлиб, уларнинг 56 киши зудлик билан ўз-ўзини эвакуация қилган.
Қосим-Жўмарт Тўқаев ҳукуматга кончилар оилаларига ёрдам кўрсатиш бўйича топшириқ берган. Воқеа ҳолатларига ойдинлик киритиш учун ҳукумат комиссияси тузилган.
Эслатиб ўтамиз, август охирларида Қозоғистоннинг Жамбил вилояти Тараз шаҳри ташқарисида жойлашган ҳарбий омборда ҳам портлашлар содир бўлганди. 27 август куни Шавкат Мирзиёев Қозоғистон президенти Қосим-Жўмарт Тўқаев билан телефон орқали мулоқот қилиб, фожиали воқеа оқибатида инсонлар қурбон бўлгани муносабати билан самимий ҳамдардлик билдирганди.
Изоҳ (0)