Prezident Shavkat Mirziyoyev “Yurish, yugurish, mini-futbol, badminton, stritbol va Workout sport turlarini yanada rivojlantirish chora-tadbirlari to‘g‘risida”gi qarorni imzoladi, deb xabar beradi O‘zA.
Qarorga ko‘ra, Moliya vazirligi “Sog‘lom turmush tarzi” platformasi orqali amalga oshiriladigan to‘lovlarni 2022-yil uchun davlat budjeti parametrlarida nazarda tutilishini hamda 2022-yil 1-yanvardan boshlab davlat budjeti mablag‘lari hisobidan ularni to‘liq hajmda to‘lab berilishini ta’minlaydi.
2022-yil 1-yanvarga qadar “Sog‘lom turmush tarzi” platformasini takomillashtiradi, shu jumladan, axborot dasturida fuqarolar tomonidan belgilangan masofani haqiqatda bosib o‘tganini tasdiqlovchi mexanizmlarni qayta ko‘rib chiqadi.
Shuningdek, qarorga ko‘ra hokimliklar sport maydonchalarining foydalanish xususiyatini yo‘qotmagan holda va tegishli joylashuviga ko‘ra mahalla fuqarolar yig‘ini yoki uy-joy mulkdorlari shirkatlariga tekin foydalanish huquqi asosida beradi.
Eslatib o‘tamiz, Vazirlar Mahkamasining 2021-yil 28-apreldagi “Sog‘lom turmush tarzi” platformasi faoliyatini tashkil etish chora-tadbirlari to‘g‘risida”gi 253-sonli qaroriga muvofiq, aholini kunlik yurish va yugurishga targ‘ib qilish bo‘yicha “Sog‘lom turmush tarzi” platformasi, ya’ni “1hls.uz” veb-sahifasi hamda mobil ilovasi ishga tushirilgandi. Sentabr o‘rtalariga kelib, “1hls.uz” mobil ilovasi foydalanuvchilariga pul to‘lashni vaqtincha to‘xtatgan.
Bundan avval O‘zbekiston aholisi iyul oyida piyoda yurish orqali qariyb 69 mln so‘m ishlab topgani hamda O‘zbekistonda iyun oyida eng ko‘p piyoda yurgan deb topilgan fuqaro 1,8 mln so‘m bilan mukofotlangani haqida xabar berilgandi.
Izoh (0)