Инновацион ривожланиш вазирлиги ҳузуридаги Илғор технологиялар маркази ҳамда Фанлар Академияси Биоорганик кимё институти олимлари 5 ноябрь куни Тошкентда тарқалган чанг бўронидан кейин чўккан чанг таркибини ўрганиб чиқди. Бу ҳақда вазирлик матбуот хизмати хабар берди.
Чанг таҳлили учун намуналар пойтахтнинг Олмазор тумани «Беруний» метро бекати ва Мирзо Улуғбек туманининг «Академиклар шаҳарчаси» ҳудудларидан олинган. Чанг таркиби SmartSEM дастурий таъминот ёрдамида 100 микрометрдан 1 микрометргача бўлган турли масштабларда олинган.
Намуналар SEM — EVO MA 10 (Zeiss, Германия), Panalytical Empyrean рентген дифрактометри, Agilent 7890Б газ хроматографи каби қурилмаларда таҳлил қилинган. Ускуналар иши Data Collector дастури ёрдамида назорат қилинган.
Натижалар шуни кўрсатадики, чанг ҳажми 5 микронгача бўлиб, бу катталикдаги чанг зарралари анча зарарсиздир.
5 ноябрдаги чанг намуналари 42 турдаги пестицидларга газ хроматографияси ёрдамида таҳлил қилинганда намуналарда пестицидлар мавжуд эмаслиги аниқланган. Таҳлил маълумотлари чанг таркибида туз ҳам меъёрда эканини кўрсатган. Чанг намуналарида pH ўлчови чанг эриганида ишқорий хусусиятларини кўрсатган.
Намуналар таҳлили улар табиатига кўра стандарт чанг эканини кўрсатган. Чанг таркибида оғир металлар, тузлар, инсон саломатлиги учун хавфли пестицидлар мавжуд эмас.
Эслатиб ўтамиз, 4 ноябрь куни Тошкентда чанг миқдори рухсат этилган меъёрдан 5 баробарга, кейинроқ маҳаллий вақт билан соат 21:00 ва 23:00 орасида 30 баробаргача кўтарилганди ва пойтахт ҳавонинг ифлосланиш даражаси бўйича дунёда биринчи ўринга чиқди. 6 ноябрь кундузи ҳавонинг исиши атмосферада чанг таркиби сезиларсиз камайишига олиб келди, аммо чангли ғубор бутунлай тарқалмади. 7 ноябрь куни эса ҳавонинг ифлосланиш даражаси аввалги кунга нисбатан пасая бошлади. 8 ноябрь куни Тошкент ҳавосидаги чанг миқдори нормал кўрсаткичга қайтган.
Изоҳ (0)