Ўзбекистон миллий терма жамоасининг ноябрь ойидаги ФИФА кунларида ташкил этиладиган йиғин учун жалб этилган футболчиларнинг якуний рўйхати эълон қилинди.
Аввалроқ Сречко Катанец 28 футболчидан иборат кенгайтирилган таркибни эълон қилганди. Якуний қайдномада эса бир қатор ўзгаришлар юз берган. Кенгайтирилган таркибга киритилган дарвозабон Санжар Қувватов («Пахтакор»), ҳимоячи Жалолиддин Жумабоев («Локомотив»), ярим ҳимоячилар Санжар Қодирқулов, Жавоҳир Сидиқов (иккиси – «Локомотив»), ҳужумчи Азизбек Омонов (Локомотив) якуний қайдномадан жой олмаган.
Терма жамоадан чақирув олган ҳимоячи Рустам Ашурматов виза билан боғлиқ муаммолар сабаб бу галги йиғинда иштирок этолмайдиган бўлди. Унинг ўрнига «Пахтакор» клуби аъзоси Марлен Чобанов жалб этилган.
«Championat.asia»нинг хабар қилишича, Беларуснинг «БАТЭ» жамоаси ҳужумчиси Шаҳбоз Умаров коронавирусга чалингани сабаб ўқув-машғулотлар йиғинини ўтказиб юборади. Унинг ўрнига қайси футболчи терма жамоага жалб этилиши борасида ҳозирча маълумот берилмаган.
Ўзбекистон Миллий терма жамоаси 8 ноябрдан 16 ноябрга қадар Тошкент ва Тбилиси шаҳарларида ўқув-машғулот йиғини ўтказади. Йиғин давомида Сречко Катанец шогирдлари 15 ноябрь куни Грузия терма жамоаси билан ўртоқлик учрашувида майдонга тушади.
Эслатиб ўтамиз, Ўзбекистон миллий терма жамоаси сентябрь ойида Швецияга қарши ўртоқлик ўйини ўтказиб, 1:2 ҳисобида мағлуб бўлганди. Октябрь ойидаги ўртоқлик учрашувларида эса Малайзия (5:1) устидан ғалаба қозониб, Иорданияга қарши ўйинда (0:3) мағлубиятга учраганди.
Изоҳ (0)