«Миллион доллар берса ҳам қиморни реклама қилмайман». Баҳодир Жалолов марҳум отаси, футбол ва шахсий ҳаёти ҳақида

Токио—2020 Олимпиадасида бокс бўйича олтин медал соҳиби Баҳодир Жалолов «Sports.uz» сайтига интервью берди.

Сербияда бўлиб ўтган бокс бўйича Жаҳон чемпионатида нега иштирок этмаётгани ҳақида

Спорт формасида бўлмаганим сабаб иштирок этишни хоҳламадим. Чунки Токиода бўлиб ўтган Олимпиададан 2,5 ой ўтиб, Жаҳон чемпионати ўтказилмоқда. Ўйлайманки, ҳар бир спортчи бир йилда 2-3 марта спорт формасига кира олмайди. Жаҳон Чемпионати кичкина мусобақа эмас, шунинг учун таваккал қилгим келмади. Олимпиадага қадар дам олишсиз машғулотлар бўлди. Спортчи Олимпиадада ғалаба қозона олармиканман деган ўйлар билан психологик жиҳатдан ҳам чарчайди. Мана шу сабаб ушбу Жаҳон чемпионатида иштирок этмадим ва профессионал боксга ўтишни ният қиляпман.

Ҳаваскор боксдан кетмагани ҳақида

Профессионал боксга ўтдим дегани ҳаваскор боксдан кетдим дегани эмас. Балки, Ўзбекистонда бўладиган Жаҳон чемпионати, Францияда бўлиб ўтадиган Олимпиадада иштирок этарман. Олдиндан ҳеч нарсани айта олмайман.

Айни пайтда ҳаваскор боксдаги энг кучли терма жамоалар ҳақида

Ўзбекистон, Куба, Россия ва Қозоғистон. Мана шу тўрт жамоа, менимча, энг кучлилари. Ҳар бир терма жамоада кучли боксчилар бор.

Спортчи қизга уйланмаслиги ҳақида

Спортчи қизга уйланаман деб ният қилмаганман. Чунки мен битта ўғилман, онам ёлғиз. Онамнинг ёнида далда бўлиб турадиган қиз керак. Спортчи бўлса, мен билан йиғинларга боради, мусобақаларга қатнашади. Шунинг учун онамнинг ёнида бўладиган рафиқа излаяпман. Ҳозирча топилгани йўқ, аввало ўзимга турмуш ўртоқ эмас, бўлажак фарзандларимга она излаяпман. Уйланиш ҳам осон эмас экан, авваллари ёшимиз етса, уйланиб кетавераман деб ўйлардик. Лекин ҳозирда қиз топиш ҳам анча жиддий ишлигини тушунганман. Чунки умрингизнинг ярмидан ҳам кўпини у билан бирга ўтказасиз. Шунинг учун шошилмаслик керак экан.

Оғир вазн тоифасидаги UFC чемпиони Френсис Нганну билан профессионал боксда жанг қилиши эҳтимоли ҳақида

Агар у билан жанг қилиш керак бўлса, албатта, қабул қиламан. Ҳозир у билан жанг қилишга тайёрман. Агар UFC жангчиси боксга ўтса, менимча, Ўзбекистоннинг учинчи рақамли боксчиси ҳам исталган MMA’чини ура олади. Бокс — бу классика. Кўча уришини билсанг, UFC’да уришишинг мумкин, лекин рингга чиқа олмайсан. Чунки боксда ақл керак, техника керак биринчи ўринда. MMA бошқа спорт тури.

Отаси ҳақида

Ҳар бир мусобақада кўзимдан ёш чиқади, чунки отамни кўп эслайман. Қанийди отам шу ютуқларимни кўрса. Хонага қамалиб олиб, хаёлан гаплашаман отам билан. Отасизлик қандай бўлишини, отаси йўқлар тушунади.

Қимор рекламасида суратга тушмаслиги ҳақида

Одамларга зарар берадиган ҳар қандай нарсани рекламасида тушмайман. Миллион доллар берса ҳам қимор рекламасида иштирок этмайман. Букмекер компанияларидан жуда кўп таклифлар бўлади, лекин барчасини рад қиламан. Инсонга зарари тегмайдиган рекламаларга тушишга ҳаракат қиламан.

Ҳаётдаги мақсадлари ҳақида

Спорт ўз йўлига, энг биринчи ўринда онамни Ҳаж сафарига юборишни ният қилганман. Ундан сўнг оила қуриш ҳам ҳозирги кундаги мақсадларимдан бири. Ёшим 27 да. Мен сафарда бўлсам, онам уйда ёлғиз қолади, ундан ташқари инсонга барибир умр йўлдош, фарзанд керак.

Ўзбекистон футбол терма жамоаси нега Жаҳон Чемпионатига чиқа олмаётгани ҳақида

Бу савол менинг ўзимни ҳам қийнайди. Футбол мен учун иккинчи спорт тури деса ҳам бўлади. Ёшлигимда Ўзбекистон терма жамоасининг бирорта ўйинини қолдирсам, туни билан ухлолмасдан йиғлаб чиқардим. Ўзим ҳам футболчи бўлганман, шунинг учун терма жамоани жуда ҳам яхши кўрардим. Ёшларга кўпроқ эътибор қаратиш лозим. Академиядан яхши спортчиларни олиб, легионер сифатида қайсидир давлатни клубларига жўнатиш керакдир. Ҳозир ўзбек футболи учун яратилаётган шароит жуда кўп давлатларникидан яхшироқ.

Боксни танлашига отаси сабабчи бўлгани ҳақида

Футболни жуда яхши ўйнардим. Тошкент, Қашқадарё академияларидан таклифлар бўлган. Лекин раҳматли отам футболчи бўлишимни хоҳламаган. Отам учун бокс спорт турини танлаганман. Менга тўғри йўл кўрсатгани учун отамдан миннатдорман.

Баҳодир Жалолов, боксчи