“Million dollar bersa ham qimorni reklama qilmayman”. Bahodir Jalolov marhum otasi, futbol va shaxsiy hayoti haqida

Tokio—2020 Olimpiadasida boks bo‘yicha oltin medal sohibi Bahodir Jalolov “Sports.uz” saytiga intervyu berdi.

Serbiyada bo‘lib o‘tgan boks bo‘yicha Jahon chempionatida nega ishtirok etmayotgani haqida

Sport formasida bo‘lmaganim sabab ishtirok etishni xohlamadim. Chunki Tokioda bo‘lib o‘tgan Olimpiadadan 2,5 oy o‘tib, Jahon chempionati o‘tkazilmoqda. O‘ylaymanki, har bir sportchi bir yilda 2-3 marta sport formasiga kira olmaydi. Jahon Chempionati kichkina musobaqa emas, shuning uchun tavakkal qilgim kelmadi. Olimpiadaga qadar dam olishsiz mashg‘ulotlar bo‘ldi. Sportchi Olimpiadada g‘alaba qozona olarmikanman degan o‘ylar bilan psixologik jihatdan ham charchaydi. Mana shu sabab ushbu Jahon chempionatida ishtirok etmadim va professional boksga o‘tishni niyat qilyapman.

Havaskor boksdan ketmagani haqida

Professional boksga o‘tdim degani havaskor boksdan ketdim degani emas. Balki, O‘zbekistonda bo‘ladigan Jahon chempionati, Fransiyada bo‘lib o‘tadigan Olimpiadada ishtirok etarman. Oldindan hech narsani ayta olmayman.

Ayni paytda havaskor boksdagi eng kuchli terma jamoalar haqida

O‘zbekiston, Kuba, Rossiya va Qozog‘iston. Mana shu to‘rt jamoa, menimcha, eng kuchlilari. Har bir terma jamoada kuchli bokschilar bor.

Sportchi qizga uylanmasligi haqida

Sportchi qizga uylanaman deb niyat qilmaganman. Chunki men bitta o‘g‘ilman, onam yolg‘iz. Onamning yonida dalda bo‘lib turadigan qiz kerak. Sportchi bo‘lsa, men bilan yig‘inlarga boradi, musobaqalarga qatnashadi. Shuning uchun onamning yonida bo‘ladigan rafiqa izlayapman. Hozircha topilgani yo‘q, avvalo o‘zimga turmush o‘rtoq emas, bo‘lajak farzandlarimga ona izlayapman. Uylanish ham oson emas ekan, avvallari yoshimiz yetsa, uylanib ketaveraman deb o‘ylardik. Lekin hozirda qiz topish ham ancha jiddiy ishligini tushunganman. Chunki umringizning yarmidan ham ko‘pini u bilan birga o‘tkazasiz. Shuning uchun shoshilmaslik kerak ekan.

Og‘ir vazn toifasidagi UFC chempioni Frensis Ngannu bilan professional boksda jang qilishi ehtimoli haqida

Agar u bilan jang qilish kerak bo‘lsa, albatta, qabul qilaman. Hozir u bilan jang qilishga tayyorman. Agar UFC jangchisi boksga o‘tsa, menimcha, O‘zbekistonning uchinchi raqamli bokschisi ham istalgan MMA’chini ura oladi. Boks — bu klassika. Ko‘cha urishini bilsang, UFC’da urishishing mumkin, lekin ringga chiqa olmaysan. Chunki boksda aql kerak, texnika kerak birinchi o‘rinda. MMA boshqa sport turi.

Otasi haqida

Har bir musobaqada ko‘zimdan yosh chiqadi, chunki otamni ko‘p eslayman. Qaniydi otam shu yutuqlarimni ko‘rsa. Xonaga qamalib olib, xayolan gaplashaman otam bilan. Otasizlik qanday bo‘lishini, otasi yo‘qlar tushunadi.

Qimor reklamasida suratga tushmasligi haqida

Odamlarga zarar beradigan har qanday narsani reklamasida tushmayman. Million dollar bersa ham qimor reklamasida ishtirok etmayman. Bukmeker kompaniyalaridan juda ko‘p takliflar bo‘ladi, lekin barchasini rad qilaman. Insonga zarari tegmaydigan reklamalarga tushishga harakat qilaman.

Hayotdagi maqsadlari haqida

Sport o‘z yo‘liga, eng birinchi o‘rinda onamni Haj safariga yuborishni niyat qilganman. Undan so‘ng oila qurish ham hozirgi kundagi maqsadlarimdan biri. Yoshim 27 da. Men safarda bo‘lsam, onam uyda yolg‘iz qoladi, undan tashqari insonga baribir umr yo‘ldosh, farzand kerak.

O‘zbekiston futbol terma jamoasi nega Jahon Chempionatiga chiqa olmayotgani haqida

Bu savol mening o‘zimni ham qiynaydi. Futbol men uchun ikkinchi sport turi desa ham bo‘ladi. Yoshligimda O‘zbekiston terma jamoasining birorta o‘yinini qoldirsam, tuni bilan uxlolmasdan yig‘lab chiqardim. O‘zim ham futbolchi bo‘lganman, shuning uchun terma jamoani juda ham yaxshi ko‘rardim. Yoshlarga ko‘proq e’tibor qaratish lozim. Akademiyadan yaxshi sportchilarni olib, legioner sifatida qaysidir davlatni klublariga jo‘natish kerakdir. Hozir o‘zbek futboli uchun yaratilayotgan sharoit juda ko‘p davlatlarnikidan yaxshiroq.

Boksni tanlashiga otasi sababchi bo‘lgani haqida

Futbolni juda yaxshi o‘ynardim. Toshkent, Qashqadaryo akademiyalaridan takliflar bo‘lgan. Lekin rahmatli otam futbolchi bo‘lishimni xohlamagan. Otam uchun boks sport turini tanlaganman. Menga to‘g‘ri yo‘l ko‘rsatgani uchun otamdan minnatdorman.

Bahodir Jalolov, bokschi