Давлат активларини бошқариш агентлиги шу йилнинг июль ойида Тошкент вилояти Бўстонлиқ туманида жойлашган «Белдирсой оромгоҳи» дам олиш маскани дор йўли билан бирга сотилишини маълум қилганди. Дам олиш маскани савдосининг иккинчи босқичи якунланди, деб хабар бермоқда Spot.
Маълум бўлишича, Давактив агентлигида оммавий савдоларга чиқарилган «Белдирсой оромгоҳи» дам олиш маскани ва «Белдирсой» спорт базаси (дор йўли)ни сотиб олиш бўйича савдо жараёнларининг иккинчи босқичига ўтган жами 4 нафар талабгорнинг ёпиқ конвертда тақдим этган тижорат таклифлари пакети ошкора очилган. Ушбу жараёнда Давлат тендер комиссияси аъзолари, талабгорлар шахсан ва пандемия шароитидан келиб чиқиб, видеоконференц алоқа воситаси орқали иштирок этган.
Қайд этилишича, талабгорларнинг давлат активини сотиб олиш бўйича тижорат таклифлари кўриб чиқилиб, 2 нафар талабгор билан нарх таклифини янада яхшилаш ва тўлов муддатларини қисқартириш бўйича музокаралар ўтказиш юзасидан қарор қабул қилинган. Савдо жараёни тартибига мувофиқ, Давактив агентлиги томонидан савдо иштирокчиларига индивидуал хабарнома юборилган.
Эслатиб ўтамиз, агентлик 2021 йил март ойи сўнггида «Малика» савдо мажмуаси, «Сижжак», «Белдирсой» ва бошқа бир неча йирик объектлар сотувга қўйилганини маълум қилганди. Уларнинг бир қанчаси ўз харидорини топган. Аммо «Белдирсой» учун харидор топилмагач, объект учун талабгорлардан таклиф қабул қилиш муддати аввал 1 июль, сўнг 15 июлга қадар узайтирилган.
Изоҳ (0)