Шавкат Мирзиёев Ўзбекистон Президенти сифатида иккинчи маротаба қачон қасамёд қилиши маълум бўлди

Президентликка сайланган Шавкат Мирзиёевнинг инаугурация маросими 6 ноябрь куни бўлиб ўтиши режалаштирилган, деб хабар беради «Интерфакс». «Дарё» манбаси ушбу маълумотни тасдиқлади.

Маълум қилишича, инаугурация Тошкентда Қонунчилик палатаси ва Сенатнинг қўшма мажлисида бўлиб ўтади.

Хабарда айтилишича, сайланган президент бир вақтнинг ўзида қўлини Конституция ва Қуръонга қўйиб қасамёд қилиши керак бўлади. Қасамёд қабул қилганидан сўнг Президентга 2021 йил октябрь ойида таъсис этилган президентлик ҳокимиятининг ўзига хос белгилари – кўкрак нишони ва байроғи ҳам топширилади.

Эслатиб ўтамиз, 29 октябрь куни Марказий сайлов комиссияси Шавкат Мирзиёевни кейинги беш йилга Ўзбекистон Президенти лавозимига сайланган деб ҳисоблаш тўғрисида қарор қабул қилганди. Сайлов кодексига кўра, Ўзбекистон Президенти Марказий сайлов комиссияси томонидан Президент сайлови натижалари расмий равишда эълон қилинган кундан эътиборан кечи билан икки ой ичида Олий Мажлис палаталарининг қўшма мажлисида қасамёд қилган пайтдан эътиборан ўз лавозимига киришади.

Ўзбекистонда президент сайлови 2021 йил 24 октябрь куни бўлиб ўтди. Мамлакат бўйлаб очилган 10 мингдан ортиқ сайлов участкалари тонг соат 08:00 дан кеч соат 20:00 га қадар сайловчиларни қабул қилди. Марказий сайлов комиссияси раиси Зайниддин Низомхўжаев берган маълумотга кўра, сайловда жами рўйхатга олинган 20 158 907 нафар сайловчининг 16 212 343 нафари, яъни сайловчиларнинг 80,4 фоизи овоз берди. Сайлов кодексининг 96-моддасига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса сайлов ўтган ҳисобланади.

Овоз беришда иштирок этган сайловчилар томонидан ҳар бир номзодни ёқлаб берилган овозлар сони қуйидагича:

• «Адолат» социал-демократик партиясидан номзод Баҳром Абдуҳалимовга – 549 минг 766 нафар ёки овоз беришда иштирок этган сайловчиларнинг 3,39 фоизи;
• Тадбиркорлар ва ишбилармонлар ҳаракати – Ўзбекистон Либерал-демократик партиясидан номзод Шавкат Мирзиёевга – 12 миллион 988 минг 964 нафар ёки овоз беришда иштирок этган сайловчиларнинг 80,12 фоизи;
• Экологик партиядан номзод Нарзулло Обломурадовга – 670 минг 641 нафар ёки овоз беришда иштирок этган сайловчиларнинг 4,14 фоизи;
• «Миллий тикланиш» демократик партиясидан номзод Алишер Қодировга – 888 минг 515 нафар ёки овоз беришда иштирок этган сайловчиларнинг 5,48 фоизи;
• Халқ демократик партиясидан номзод Мақсуда Ворисовага – 1 миллион 75 минг 16 нафар ёки овоз беришда иштирок этган сайловчиларнинг 6,63 фоизи ёқлаб овоз берган.