4 ноябрь куни Ўзбекистон бўйлаб эсган чангли шамол ва қумбўрони оқибатида Бухоро вилояти Пешку тумани ҳокимлиги биносининг томи учиб кетди. Туман ҳокими Ваҳобжон Қаҳҳоровнинг «Дарё»га хабар беришича, шифт ҳокимлик биносидан 20 метрча наридаги йўл ёқасига бориб тушган.
«Чамаси, соат 17:00 лар эди. Иш айни авжида, ҳокимлик биносига ўз ташвиш, муаммолари билан айни одамлар келишаётган пайт. Эрталабдан тўзиётган шамол кутилмаганда кучли қумбўронга айланди. Ҳокимлик биноси том қисмида ваҳимали кўчиш содир бўлди. Яхшиям, одамлар сергак ва ҳушёр. Ҳеч кимга жисмоний зиён етмади», — дейди туман ҳокими.
Ваҳобжон Қаҳҳоровнинг сўзларига кўра, туман ҳокимлиги биноси олдидаги усти ёпиқ аҳоли дам олиш ўриндиқларига ҳам жиддий шикаст етган. Ёритгичлар синиб, бинога электр энергияси етказиб берувчи барча симлар ишдан чиққан. Шунингдек, туман солиқ идораси биноси шифти ҳам қумбўронда қўпорилиб кўчиб тушган. Бир нечта аҳоли яшаш уйларининг шифтлари кўчган, кўнгилсиз оқибатлардан эҳтиётланиш учун қатор манзилларни электр энергиясидан узиб қўйишга тўғри келган.
Туман ҳокимининг таъкидлашича, ҳокимлик вакилига тегишли Nexia автомашинаси учиб тушган том остида қолган ва жиддий шикастланган.
«Табиий офат туфайли тумандаги иншоотларга, аҳоли турар жой бинолари шифтларига талафот етди. Ҳолат ҳақидаги хабарни эшитибоқ, вилоят ҳокими, Фавқулодда вазиятлар бошқармаси бошлиғи ва сектор раҳбарлари зудлик билан етиб келди. Тез кунда талафот оқибатлари бартараф этиладиган бўлди», — дейди Қаҳҳоров.
Маълум бўлишича, мазкур бинолар шифтлари бундан 7-8 йил илгари сифатли қурилиш материалларидан мустаҳкам ўрнатилган. 2019 йилда Бухорода эсган кучли шамолга дош берган.
Эслатиб ўтамиз 4 ноябрь куни тупроқнинг қуруқ устки қатламларини шамол кўтаргани туфайли Тошкент шаҳри ва бошқа вилоятларда чанг–қум аралаш туман юзага келди. Пойтахт ҳавосидаги чанг миқдори меъёрдан 5 баробар ошиб кетди. Шу билан бирга, ҳаво ҳарорати нолдан пастга тушди.
Изоҳ (0)