Таълим сифатини назорат қилиш инспекцияси 4 ноябрь куни олий таълим муассасалари миллий рейтингини эълон қилишга бағишланган матбуот анжумани ташкил этди. Бу ҳақда инспекция ахборот хизмати «Дарё»га маълум қилди.
Рейтинг натижаларига кўра, етакчи ўринни Тошкент ирригация ва қишлоқ хўжалигини механизациялаш муҳандислари институти эгаллаган. Юқори бешталикни- Ўзбекистон миллий университети,
- Тошкент тиббиёт академияси,
- Самарқанд давлат универститети,
- Тошкент молия институти тўлдирган.
- Фарғона жамоат саломатлиги тиббиёт институти,
- Навоий давлат педагогика институти,
- Самарқанд давлат архитектура-қурилиш институти,
- Нукус давлат педагогика институти,
- Қўқон давлат педагогика институти жой олган.
Шунингдек, илмий тадқиқотлар орқали энг кўп маблағ ишлаб топган ОТМлар рейтинги ҳам эълон қилинди. Унга кўра, энг кўп маблағ ишлаб топган ОТМлар:
- Тошкент ирригация ва қишлоқ хўжалигини механизациялаш муҳандислари институти;
- Навоий давлат кончилик институти;
- Тошкент давлат аграр университети.
Маълум бўлишича, ОТМлардаги илмий салоҳият сўнгги уч йилда ўртача 4,2 фоизга ошган. Нуфузли халқаро журналлардаги илмий мақолалар сони ўтган йилга нисбатан 2 баробарга ошиб, 15170 тага етган. Хорижий талабалар сони эса 1,5 баробарга ўсди ва 4760 нафарни кўрсатган.
Ўрганиш натижаларига кўра, Ўзбекистонга хорижий профессор-ўқитувчилари ва талабалари келиб фаолият олиб бораётган давлатлар сони икки баравар ошиб, 62 тани ташкил этган. Энг кўп хорижлик профессор-ўқитувчилар Туркия, Беларусь, Жанубий Корея, Россия давлатларидан ташриф буюрган. Энг кўп талабалар Россия, Қозоғистон, Туркманистон, Покистон, Афғонистондан келган.
Бундан ташқари, олийгоҳларнинг илмий салоҳияти рейтинги ҳам эълон қилинган. Унга кўра, юқори ўринларни қуйидаги ОТМлар эгаллаган:- Тошкент молия институти;
- Ўзбекистон миллий университети;
- Тошкент педиатрия тиббиёт институти;
- Ўзбекистон халқаро ислом академияси;
- Тошкент давлат ўзбек тили ва адабиёти университети;
- Самарқанд давлат университети.
Илк маротаба тузилган ОТМ филиаллари рейтинг натижаларига кўра, юқори ўринни Тошкент ирригация ва қишлоқ хўжалигини механизациялаш муҳандислари институти Бухоро филиали эгаллаган. Энг охирги ўринда эса Тошкент давлат техника университетининг Термиз филиали қайд этилган.
Инспекция хабарига кўра, мазкур рейтингларни тузишдан мақсад филиалларнинг таълим сифатига бўлган ҳисобдорлигини ошириш ва уларни таълим сифатини ошириш бўйича меҳнатларини рағбатлантириш ҳисобланади.
Эслатиб ўтамиз, 2020 йил октябрь ойида Таълим сифатини назорат қилиш давлат инспекцияси ОТМларнинг миллий рейтингини эълон қилганди. Ўтган йилги ва ҳозирги рейтинг солиштирилганда, ЎзМУ етакчиликни Тошкент ирригация ва қишлоқ хўжалигини механизациялаш муҳандислари институтига бой бериб, иккинчи ўринни эгаллаган. Самарқанд давлат университети 3-ўриндан бир поғона пастлаб, 4-ўринга тушган. Шунингдек, ўтган йилги рейтингда кучли бешталикда бўлган ТАТУ 2021 йилги рейтингда 13-ўринни, Тошкент давлат аграр университети 14-ўринни банд этган. Янгиланган рейтингда топ-5 таликда уларнинг ўрнига Тошкент тиббиёт академияси ва Тошкент молия институти қайд этилган.
Изоҳ (0)