Prezidentlikka saylangan Shavkat Mirziyoyevning inauguratsiya marosimi 6-noyabr kuni bo‘lib o‘tishi rejalashtirilgan, deb xabar beradi “Interfaks”. “Daryo” manbasi ushbu ma’lumotni tasdiqladi.
Ma’lum qilishicha, inauguratsiya Toshkentda Qonunchilik palatasi va Senatning qo‘shma majlisida bo‘lib o‘tadi.
Xabarda aytilishicha, saylangan prezident bir vaqtning o‘zida qo‘lini Konstitutsiya va Qur’onga qo‘yib qasamyod qilishi kerak bo‘ladi. Qasamyod qabul qilganidan so‘ng Prezidentga 2021-yil oktabr oyida ta’sis etilgan prezidentlik hokimiyatining o‘ziga xos belgilari – ko‘krak nishoni va bayrog‘i ham topshiriladi.
Eslatib o‘tamiz, 29-oktabr kuni Markaziy saylov komissiyasi Shavkat Mirziyoyevni keyingi besh yilga O‘zbekiston Prezidenti lavozimiga saylangan deb hisoblash to‘g‘risida qaror qabul qilgandi. Saylov kodeksiga ko‘ra, O‘zbekiston Prezidenti Markaziy saylov komissiyasi tomonidan Prezident saylovi natijalari rasmiy ravishda e’lon qilingan kundan e’tiboran kechi bilan ikki oy ichida Oliy Majlis palatalarining qo‘shma majlisida qasamyod qilgan paytdan e’tiboran o‘z lavozimiga kirishadi.
O‘zbekistonda prezident saylovi 2021-yil 24-oktabr kuni bo‘lib o‘tdi. Mamlakat bo‘ylab ochilgan 10 mingdan ortiq saylov uchastkalari tong soat 08:00 dan kech soat 20:00 ga qadar saylovchilarni qabul qildi. Markaziy saylov komissiyasi raisi Zayniddin Nizomxo‘jayev bergan ma’lumotga ko‘ra, saylovda jami ro‘yxatga olingan 20 158 907 nafar saylovchining 16 212 343 nafari, ya’ni saylovchilarning 80,4 foizi ovoz berdi. Saylov kodeksining 96-moddasiga muvofiq, agar saylovchilar ro‘yxatiga kiritilgan fuqarolarning 33 foizi ovoz berishda ishtirok etgan bo‘lsa saylov o‘tgan hisoblanadi.
Ovoz berishda ishtirok etgan saylovchilar tomonidan har bir nomzodni yoqlab berilgan ovozlar soni quyidagicha:
- “Adolat” sotsial-demokratik partiyasidan nomzod Bahrom Abduhalimovga – 549 ming 766 nafar yoki ovoz berishda ishtirok etgan saylovchilarning 3,39 foizi;
- Tadbirkorlar va ishbilarmonlar harakati – O‘zbekiston Liberal-demokratik partiyasidan nomzod Shavkat Mirziyoyevga – 12 million 988 ming 964 nafar yoki ovoz berishda ishtirok etgan saylovchilarning 80,12 foizi;
- Ekologik partiyadan nomzod Narzullo Oblomuradovga – 670 ming 641 nafar yoki ovoz berishda ishtirok etgan saylovchilarning 4,14 foizi;
- “Milliy tiklanish” demokratik partiyasidan nomzod Alisher Qodirovga – 888 ming 515 nafar yoki ovoz berishda ishtirok etgan saylovchilarning 5,48 foizi;
- Xalq demokratik partiyasidan nomzod Maqsuda Vorisovaga – 1 million 75 ming 16 nafar yoki ovoz berishda ishtirok etgan saylovchilarning 6,63 foizi yoqlab ovoz bergan.
Izoh (0)