Миробод тумани ИИО ФМБ ходимлари гиёҳвандлик воситаларини тарқатишга қарши курашга йўналтирилган профилактик тадбирлар давомида реклама флаерларини тарқатиш билан шуғулланган шахсни қўлга олди, деб хабар беради Тошкент шаҳар ИИББ ахборот хизмати.
Маълум қилинишича, 26 ёшли Ш.Ш.дан ашёвий далиллар сифатида 1093 та гиёҳвандлик воситалари савдоси билан шуғулланувчи интернет-дўконларни реклама қилувчи флаерлар олиб қўйилган. Суҳбат давомида Ш.Ш. Telegram орқали унга ўзини Ф. деб таништирган шахс боғланиб, флаерлар тарқатиш йўли билан даромад таклиф қилганини билдирган.
29 октябрь куни Ф. исмли шахс Ш.Ш.га 1750-1800 та флаерни берган. Флаерларнинг бир қисми Яшнобод ва Миробод туманларида тарқатилган.
Кейинчалик тергов олди текшируви давомида 2003 йилда туғилган Ф.К. қўлга олинган. Ф.К.нинг маълум қилишича, 2021 йилнинг сентябрь ойида у махсус сайт орқали флаерлар тарқатиш билан боғлиқ «иш топган». Флаерларни у тайёр ҳолда Мирзо Улуғбек туманидаги босмахонадан олган.
Тез орада босмахона ишчилари — 23 ёшли Р.Р. ва 36 ёшли Д.Х. қўлга олинган. Ашёвий далиллар сифатида 6000 та тайёр флаерлар олиб қўйилган. Мазкур факт асосида тўпланган ҳужжатлар Миробод тумани ИИО ФМБга йўналтирилган.
Эслатиб ўтамиз, сўнгги йилларда гиёҳванд моддалар тўғрисида реклама вақти-вақти билан Тошкентнинг турли туманларида пайдо бўлаётгани ҳақида хабар берилган эди. Хусусан, Тошкентдаги уйлар деворида гиёҳванд моддалар рекламаси ёзувларини қолдириш билан шуғулланган икки йигит 6 апрель куни ушланганди.
Изоҳ (0)